Arnór Ingvi á leið til Norrköping

Keflvíkingurinn stórefnilegi, Arnór Ingvi Traustason, er undir smásjá erlendra félaga og hann er núna á leið til reynslu í Svíþjóð.

Það er félag Gunnars Heiðars Þorvaldssonar, Norrköping, sem vill skoða kappann.

"Ég verð úti hjá þeim núna frá sjöunda til elleftra júlí. Mér líst bara vel á þetta," sagði Arnór Ingvi við Vísi í dag.

Arnór er aðeins tvítugur að aldri en hann fór út til Noregs síðasta sumar og spilaði með Sandnes Ulf. Lék þar tíu leiki með liðinu.

"Það var gaman og góð reynsla. Þeir vildu fá mig aftur en ég vildi sýna tryggð við Keflavík og spila þar áfram."

Arnór segist horfa til Skandinavíu í framtíðinni.

"Stefnan er að komast út eftir sumarið og gott að byrja í Skandinavíu. Það er stökkpallur fyrir eitthvað meira. Ég reikna með því að klára samt tímabilið með Keflavík fyrst."