FH og Ajax í samstarf

Íslandsmeistarar FH og Hollandsmeistarar Ajax frá Amsterdam hafa náð samkomulagi um samstarf milli félaganna tveggja. Barna- og unglingaráð Knattspyrnudeildar FH og Ajax online academy gerðu þriggja ára samning.  Samstarfið felur í sér að þjálfarar FH fá aðgang að upp undir þúsund æfingum auk þess sem þetta kerfi auðveldar þjálfurum að skipuleggja æfingar, gera áætlanir og halda betur utan um sína iðkendur. Þetta kemur fram á heimasíðu FH-inga.

Ajax online academy er einskonar útibú frá Ajax sem er eitt frægasta knattspyrnulið Evrópu og þekkt fyrir góða barna- og unglingaþjálfum. Þetta kerfi er einnig notað hjá Ajax við skipulagningu á þjálfun í þeirra barna- og unglingastarfi auk þess sem hollenska knattspyrnusambandið hefur nýverið keypt hugbúnaðinn sem notaður er í Ajax online academy.

Sander de Goede stjórnandi Ajax online academy og Patrick Ladru yfirþjálfari unglingastarfs Ajax komu nýverið í Kaplakrikann og héldu námskeið fyrir þjálfara knattspyrnudeildarinnar.

Ladru er einn þekktasti þjálfari hjá Ajax og hefur unnið m.a. með Johan Cruyff og Louis Van Gaal og þjálfað leikmenn eins og Wesley Snejder, Patrick Kluivert, Clarence Seedorf, Rafael Van der Vaart ofl.

Námskeiðið var bæði bóklegt og verklegt þar sem farið var yfir netkerfið og hugmyndafræði Ajax í barna- og unglingaþjálfun. Jafnframt var skrifað undir þriggja ára samstarfssamning FH og Ajax online academy.

Það er hægt að lesa meira um málið með því að smella hér.