Veigar Páll: Þetta var algjört óviljaverk

Veigar Páll Gunnarsson, leikmaður Stjörnunnar, hefur sent frá sér yfirlýsingu þar sem hann biður leikmann Þórs afsökunar á því að hafa gefið honum olnbogaskot í leik liðanna á sunnudag.

Hann segir þó um óviljaverk hafi verið að ræða en málið var tekið til umfjöllunar í Pepsi-mörkunum í gærkvöldi.

Veigar Páll baðst einnig afsökunar á atviki sem átti sér stað eftir leik, sem og ummælum sínum í viðtölum við fjölmiðla en þar gerði hann lítið úr liði Þórs.

Veigar var í dag dæmdur í tveggja leikja bann vegna rauða spjaldsins sem hann fékk.

Yfirlýsing Veigars í heild sinni:

„Undirritaður vill koma eftirfarandi á framfæri varðandi atvik í leik Stjörnunnar og Þórs og ummæli mín eftir leik, vegna umfjöllunar fjölmiðla um hvort tveggja.

Um algert óviljaverk var að ræða þegar ég gaf leikmanni Þórs olnbogaskot. Það var aldrei ætlun mín að meiða eða reyna að meiða viðkomandi leikmann. Þannig hef ég aldrei leikið knattspyrnu.

Hlutaðeigandi leikmaður er því hér með beðinn velvirðingar á atvikinu.

Ég bið stuðningsmenn Stjörnunnar, félaga mína í liðinu og alla knattspyrnuáhugamenn afsökunar á atviki eftir að mér var vísað af velli.

Loks bið ég Þórsara og alla knattspyrnuáhugamenn afsökunar á ódrengilegum ummælum mínum eftir leikinn þar sem ég gerði lítið úr andstæðingum okkar. Þau ummæli lét ég falla í hita leiksins og átti að vita betur.  

Ég mun ekki tjá mig frekar um þessi mál.

Með knattspyrnukveðju,

Veigar Páll Gunnarsson“