Stúdentar æfir vegna fyrirætlana LÍN

Fjöldi námsmanna mótmælir fyrirætlunum LÍN um að hækka kröfur um námsframvindu á nýstofnaðri Facebook síðu. Síðan var stofnuð fyrr í kvöld undir yfirskriftinni „Námsmenn af fullri alvöru - gegn niðurskurði fjárframlaga til Lín". Þar gagnrýna nemendur ummæli Illuga Gunnarssonar, menntamálaráðherra, um að þeir sem séu í námi af fullri alvöru ættu að geta risið undir auknum kröfum lánasjóðsins.

Eins og Vísir greindi frá í dag sagði María Rut Kristinsdóttir, formaður Stúdentaráðs Háskóla Íslands, breytingarnar bitna helst á fjölskyldufólki og fólki með námsörðugleika. Nemar stundi nám við afar misjafnar aðstæður.

Á nokkrum klukkutímum hafa hátt í tvö þúsund manns látið sér líka við síðuna og deilt margvíslegum áhyggjum sínum og ástæðum þess að það getur ekki risið undir auknum kröfum. Meðal þeirra eru einstæðir foreldrar og fólk í fjarnámi sem býr erlendis. Þá lýsti nemandi við Bifröst því yfir að nýtt fyrirkomulag gerði fólki bókstaflega ómögulegt að stunda nám þar.

Vala Waldorf, nemi í félagsfræði við HÍ, á aðeins 18 einingar eftir til að ljúka BA- námi. Hún sér því fram á að þurfa að bæta við sig fjórum einingum sem koma ekki til með að nýtast henni neitt.

„Ég er að gera upp við mig hvort ég þurfi að taka einn auka áfanga sem telst ekki einu sinni inn í námið mitt og gerir ekkert nema taka tíma frá hinu, eða hvort ég þurfi að vinna mjög mikið til að eiga fyrir leigu og mat," segir hún.

Vala segir beinlínis verið að refsa þeim námsmönnum sem eru komnir langt í sínu námi. Auknar kröfur LÍN til námsframvindu setji stórt strik í reikninginn fyrir fjölmarga. „Þetta kemur líka fram svo seint, flestir eru búnir að skipuleggja næsta námsvetur núna og gera tilheyrandi ráðstafanir."