"Bitnar á fjölskyldufólki og fólki með námsörðugleika"

Stúdentaráð Háskóla Íslands er óánægt með fyrirætlanir LÍN um að hækka kröfur um námsframvindu. Félagið segir breytingarnar hafa neikvæð áhrif á fjölda stúdenta og leggst gegn öllum niðurskurði hjá LÍN.

Stjórn LÍN samþykkti á fundi sínum á mánudaginn að hækka kröfur um námsframvindu úr 60% í 75%, sem þýðir það að námsmenn þurfa nú að skila af sér 22 einingum á önn til að öðlast lántökurétt hjá sjóðnum.

Stúdentaráð HÍ er óánægt með breytingarnar og segir ekki rétt að niðurskurður í ríkisfjármálum eigi að bitna á LÍN.

María Rut Kristinsdóttir, formaður SHÍ hafði þetta um málið að segja:„Falli einstaklingur í 10 eininga áfanga á haustönn þá fær hann ekki námslán og hefur heldur ekki tækifæri á að þreyta upptökupróf fyrr en til dæmis í júní. Þessi einstaklingur myndi þá bara lenda í því, hafi hann verið á fyrirframgreiddum námslánum, að þá uppfyllir hann bara 20 einingar sem eru þá ekki þessar 22 sem að tillaga stjórnar LÍN fer fram á. Þá yrði staða þess einstaklings sú að á hann myndi bara falla stór yfirdráttur og ég tel að nemendur þyrftu þá virkilega að hugsa sinn gang um hvort þeir geti haldið áfram í námi."

Um þúsund stúdentar munu að öllu óbreyttu þurfa að endurskoða námsfyrirkomulag sitt, en þeir uppfylla ekki lengur skilyrði til að öðlast lántökurétt.

María segir barnafólk og fólk með námsörðugleika munu líða fyrir breytingarnar.

„Sumir eiga bara við námsörðugleika að stríða og fjölskyldufólk sem hefur ekki tök á að taka meira en er samt að reiða sig á námslánin. Það er svolítið verið að útiloka þetta fólk úr kerfinu."