Ráðherra vill rukka

Skiptar skoðanir eru um það innan ferðaþjónustunnar hvort það eigi að rukka inn á ferðamannstaði landsins eða hafa frítt inn á þá eins og tíðkast hefur í gegnum árin.

Sumir vilja koma upp náttúrupössum, aðrir vilja hafa gjaldhlið við ferðamannastaðina og þá koma söfnunarbaukar til greina eins og á Geysi í Haukadal. Ráðherra ferðamála, Ragnheiður Elín Árnadóttir vill gjaldtöku.

„Ég vil hafa þetta sem einfaldast, þetta er rétt þróun. Við þurfum að tryggja öryggi fólks, uppbyggingu á þessum stöðum og vernd náttúrunnar. Það þarf að koma á einhverskonar gjaldtöku og við verðum að vinna þetta hratt.“

Ragnheiður Elín segir að vinna við gjaldtöku sú nú þegar hafin. Hún treystir sér þó ekki að segja hvort það eigi bara að rukka útlendinga eða hvort Íslendingar þurfi líka að greiða fyrir að skoða sínar eigin náttúruperlur.

„Mér finnst þetta spurning um jafnræði. Það þarf að finna jafnvægi í þessu og ég þarf að fara yfir málið í heild sinni áður en ég tek afstöðu til þess.“ 

En hvenær verður gjaldtakan orðin almenn? „Þetta má ekki bíða lengi, best væri ef við gætum komið þessu á fyrir næsta sumar,“ segir Ragnheiður.