Þjóðfundur hinsegin fólks haldinn í dag

Samtökin 78 fagna 35 ára afmæli sínu um þessar mundir. Í tilefni þess verður haldinn fundur í Ráðhúsi Reykjavíkur sem nefnist Samtakamátturinn, þjóðfundur hinsegin fólks.

Ráðstefnan er haldin í samstarfi við Reykjavíkurborg og mun standa yfir í Tjarnarsal Ráðhússins á milli kl hálf 2 og hálf 6 í dag. Anna Pála Sverrisdóttir, formaður samtakanna 78, finnur fyrir miklum meðbyr og býst við margmenni. „Við erum mjög ánægð með að fá nýjan félagsmálaráðherra, Eygló Harðardóttur, til að ávarpa ráðstefnuna. Hún hefur sett sig vel inn í málaflokkinn og þekkir málefni hinsegin fólks mjög vel.“

Samkvæmt Regnbogakortinu, ársyfirliti og úttekt á stöðu hinsegin fólks í Evrópu, er Ísland í 10. sæti af þeim 49 löndum sem mæld voru. Anna segir þessar niðurstöður ekki vera lýsandi fyrir stemminguna í þjóðfélaginu, það sé aðallega lagalega hlutanum sem sé ábótavant.

Þó að mikið vatn hafi runnið til sjávar síðustu ár segir Anna Pála að sé hægt að gera enn betur. „Samtökin 78 hafa náð mjög miklu fram í íslensku samfélagi á þessum 35 árum. Ég myndi segja að viðhorfsbreytingin sem hefur orðið sé kannski það stærsta, en hún hefur skilað sér inn í löggjöfina okkar þar sem við höfum náð fram alveg ótrúlegum réttarbótum.“