Aðalskipulagið fjallar um alla borgina

Í fréttum í gær gagnrýndi Júlíus Vífill Ingvarsson oddviti Sjálfstæðisflokksins í borgarstjórn nýtt aðalskipulag Reykjavíkurborgar og sagði stefnu meirihlutans um þéttingu byggðar mjög einsleita og miðborgarmiðaða. Dagur B. Eggertsson oddviti Samfylkingarinnar í borginni segir það ekki rétt, skipulagið fjalli um alla borgina. 

„Það er eiginlega frekar þannig að umræðan snýst svolítið mikið um 101 en aðalskipulagið tekur á borginni í heild," segir Dagur.

Ungt fjölskyldufólk virðist kjósa það frekar að setjast að í nágrannasveitarfélögum Reykjavíkur en í höfuðborginni sjálfri. Júlíus Vífill vill  sjá meiri áherslu á að byggja upp hverfi fyrir þetta fólk í borginni en að þétta miðbæinn þar sem íbúðir verða dýrar og aðeins á færi efnaðs miðaldra fólks.

Dagur segir að stóra verkefnið í Reykjavík sé að þróa borgina inn á við en líka búa til venjulegt húsnæði fyrir venjulegt fólk á verði sem það ræður við.

„Það er alrangt og ég væri mjög á móti því að hugsa svæðin hérna miðsvæðis sem einhver lúxushverfi fyrir fáa. Stóra verkefnið er einmitt að venjulegt verkafólk geti búið miðsvæðis á góðum stað og að  Reykjavík verði áfram blönduð borg fyrir alla," segir Dagur.

Júlíus Vífill lýsti því yfir að hann ætli ekki að styðja nýja aðalskipulagið. Dagur segir að með því sé hann að snúast gegn eigin tillögu því hann leiddi verkefnið um tíma þegar Sjálfstæðisflokkurinn var í meirihluta.

„Ég vona að það verði ekki fleiri sem detta í svona gamaldags pólitík að ætla einhvern veginn að gera þetta að meirihluta eða minnihlutamáli þegar staðreyndin er sú að við höfum öll unnið að þessu lengi, rætt okkur í gegnum stórt og smátt og eigum nú að  kynna þetta öll af stolti."