Bognuðu í dómsalnum - upplýstu um höfuðpaurinn í einu stærsta fíkniefnamáli síðari ára

Réttað var yfir sjö karlmönnum í Héraðsdómi Reykjavíkur í dag sem hafa verið ákærðir fyrir að smygla tugum kílóa af amfetamíni til landsins. Mennirnir neita að hafa lagt á ráðin um smyglið, og upplýstu loks fyrir rétti í dag hver höfðupaurinn væri.

Málið er eitt það umfangsmesta á síðastliðnum árum. Alls voru sjö menn ákærðir. Þrír þeirra, tvær bræður og einn maður sem starfaði til skamms tíma sem lögregluþjónn, eru ákærðir fyrir að hafa lagt á ráðin um innflutning á nítján kílóum af amfetamíni og 1,7 lítra af amfetamínbasa.

Bræðurnir og lögregluþjónninn fyrrverandi sendu fíkniefnin í þremur póstsendingum. Þeir neita að hafa skipulagt innflutninginn en viðurkenna hinsvegar að þeir hafi vitað að til stæði að flytja fíkniefni til landsins. Bræðurnir upplýstu réttinn í morgun um nafn raunverulegs höfuðpaurs í málinu. Sá eldri sagðist upplýsa um það núna, því maðurinn væri látinn, en hann hafi óttast um öryggi sitt áður. Að öðru leytinu til sökuðu þeir hvorn annan um skipulagningu á innflutningnum.

Talið er að hægt hafi verið að framleiða 17 kíló úr amfetamínbasanum. Því eru mennirnir sakaðir um að hafa reynt að flytja um hátt í fjörtíu kíló af amfetamíni til landsins. Sé tekið mið af gangverði á amfetamíni sem SÁÁ tók saman, kemur í ljós að götuvirði efnanna er varlega áætlað 200 milljónir króna. Sú tala hækkar líklega séu efnin drýgð, sem mun vera venjan þegar fíkniefnum er komið í umferð.

Aðalmeðferð málsins heldur áfram á morgun.