Þykir vænt um kaggann

„Þetta er fínasti bíll, vinnur vel og gangurinn er góður í honum - eðalvagn satt best að segja,“ segir Steingrímur J. Sigfússon fyrrverandi formaður Vinstri Grænna sem mætti á ljósbláum Volvo 142 á Bessastaði í dag.

Þetta er ekki í fyrsta skiptið sem Steingrímur mætir á þessum bíl á sérstök tilefni. Bíllinn er árgerð 1971 og var fyrstu árin í eigu frænda eiginkonu Steingríms.

„Svo fengum við hann og hann var fjölskyldubíllinn fyrstu árin, okkar eini bíll. Við erum búin að eiga hann núna í að nálgast 30 ár - þetta er skartgripur sem manni þykir vænt um,“ segir Steingrímur í samtali við Vísi.

Bíllinn flokkast sem fornbíll en vel hefur verið hugsað um hann síðustu árin. „Það var talsvert gert fyrir hann fyrir um 10 árum síðan en þetta eru sterkir og vel framleiddir bílar. Þú getur átt svona bíl mjög lengi ef þú ert góður við þá og passar upp á þá.“