Það varð allt vitlaust

Hulda Gunnlaugsdóttir, fyrrverandi forstjóri Landspítalans og núverandi forstjóri Ahus-spítala í Noregi, hafði betur í rimmu við norska landlækninn, sem setti allt á annan endann í Noregi.

Hulda er í forsíðuviðtali í nýjasta tölublaði tímaritsins Nýtt líf þar sem kemur fram að norski landlæknirinn fullyrti að spítali Huldu væri rekinn með óforsvaranlegum hætti. Fleiri læknamistök yrðu þar en á öðrum spítölum.

Hulda svaraði landlækninum fullum hálsi og vakti fyrir það mikla fjölmiðlaathygli í Noregi. Á endanum þurfti landlæknirinn að bakka með áfellisdóminn.

„Þetta var gríðarlega harður dómur og harkaleg gagnrýni fylgdi í kjölfarið. Það varð allt vitlaust,“ segir Hulda sem varð að fara ofan í saumana á öllu sem fram kom í skýrslu landlæknisins og bregðast við því.

Landlæknirinn sendi frá sér skýrsluna í júlí í fyrra eftir að lögreglan hafði haft þrettán óeðlileg dauðsföll sjúklinga á Ahus til rannsóknar. Talið er fullvíst að hægt hefði verið að bjarga þeim öllum. Neyðarástand hafði ríkt á spítalanum um nokkra hríð þar sem skorti að minnsta kosti 400 starfsmenn.

Hulda segir í viðtalinu að ástandið skýrðist af umfangsmestu breytingum sem gerðar hafa verið á norska heilbrigðiskerfinu. Fjöldi sjúklinga hafi verið aukinn en illa gekk að fá fólk til starfa.

„Við bárum saman læknamistök og óeðlileg dauðsföll milli ára og bárum tölurnar svo saman við aðra spítala í landinu. Ég svaraði landlækni með ítarlegu bréfi sem ég vann með starfsfólki spítalans þar sem ég sýndi fram á að við vorum höfð fyrir rangri sök,“ segir Hulda.

„Ég gat ekki sætt mig við að starfsfólkið okkar hefði þennan stimpil fyrir að framfylgja pólitík sem var samþykkt í Stórþinginu. Eins og með öll opinber bréfasamskipti í Noregi, þá var þetta aðgengilegt öllum, þar á meðal fjölmiðlum.  Þá varð algjör sprenging. Það hefur ekki áður gerst í Noregi að landlækni sé svarað fullum hálsi... á endanum bakkaði hann,“ segir Hulda.

Í kjölfarið á því að málið komst í hámæli var helstu stjórnendum sem komu að því skipt út, þeirra á meðal heilbrigðisráðherra Noregs. Hulda hélt aftur á móti stöðu sinni.