Landvernd krest þess að hætt verði við Bjarnarflagsvirkjun

Aðalfundur Landverndar, sem var haldinn í Reykjavík í dag, hvetur stjórn Landsvirkjunar og sveitarstjórn Skútustaðahrepps til að hlífa lífríki Mývatns við auknu álagi sem mun fylgja fyrirhugaðri Bjarnarflagsvirkjun við Mývatn.

Það verði einungis gert með því að hætta við byggingu virkjunarinnar fyrir fullt og allt. Þetta kemur fram í ályktun fundarins.

Á fundinum var kynnt niðurstaða könnunar sem Capacent-Gallup vann fyrir Landvernd. Samkvæmt henni eru 43,6% andvíg virkjanaframkvæmdum í Bjarnarflagi við Mývatn en 30,5% eru hlynnt þeim.

Í sömu könnun var spurt um afstöðu fólks til þess að fleiri álver yrðu reist hér á landi til viðbótar við þau sem þegar eru starfandi. 51,3% reyndust andvíg fleiri álverum en 30,9% hlynnt.

Svo segir í tilkynningu frá Landvernd:

Í ályktun aðalfundarins segir einnig að Umhverfisstofnun hafi sett Mývatn á rauðan lista yfir svæði sem eru talin í verulegri hættu á að tapa verndargildi sínu. Í yfirlitsskýrslu Umhverfisstofnunar segi m.a. um ógnir sem steðja að Mývatni: ,,Áform eru um að virkja í Bjarnarflagi og óvissa ríkir um áhrif virkjanaframkvæmda á vistkerfi Mývatns."

Því hvetur aðalfundur Landverndar verkefnisstjórn 3. áfanga Rammaáætlunar og Alþingi til að endurskoða flokkun Bjarnarflags í rammaáætlun, þannig að svæðið færist að minnsta kosti í biðflokk á meðan möguleg áhrif Bjarnarflagsvirkjunar á lífríki Mývatns eru rannsökuð. Alþingi er einnig hvatt til að lögleiða að nýju vernd Mývatns- og Laxársvæðisins sem var afnumin með lögum nr. 97/2004.

Einstakt lífríki Mývatns skapar því sérstöðu á heimsvísu og í verndaráætlun fyrir Mývatn og Laxá segir að það sé skylda núlifandi kynslóðar að varðveita sérstöðu svæðisins og þar með að tryggja komandi kynslóðum sama aðgengi og svipaða upplifun og við getum notið nú í dag.