Besta málamiðlun í Vatnsmýri útilokuð

Besta mögulega málamiðlun um framtíð Reykjavíkurflugvallar í Vatnsmýri yrði útilokuð, segir atvinnuflugmaðurinn Ómar Ragnarsson, um þá ákvörðun fjármálaráðherra að selja borginni hluta flugvallarins undir íbúabyggð. Ómar, sem er einn reyndasti flugmaður Íslendinga, varar við því í samtali við Stöð 2 að umrætt svæði verði tekið undir íbúabyggð þar sem með því yrði girt fyrir málamiðlun sem kæmi til móts við kröfur um aukna íbúðabyggð en bætti jafnframt notagildi vallarins.

Ómar segir að lenging austur-vestur-brautarinnar út í sjó, svo hún verði aðalbraut vallarins, geti ein og sér stórminnkað ónæði af flugvellinum.

Hann vill jafnframt að skoðað verði að leggja nýja en styttri norður-suður-braut, til að nota í hvössum norðan- og sunnanáttum, nokkurn veginn eins og hér er sýnt, með stefnu framhjá Kársnesinu til suðurs en til norðurs yfir Arnarhól. Þannig mætti leggja af bæði núverandi norður-suðurbraut og litlu brautina og losa mikið rými undir byggð en halda notagildi vallarins.

Ómar segir aðalatriðið að sýna framsýni og eyðileggja ekki í fljótræði möguleika á mismunandi lausnum.

Ómar, sem staddur er erlendis þessa dagana, sendi fréttastofu nánari útskýringar þar sem hann segir meðal annars:

"Ástæða þess hvað norður-suður-brautin er svona mikið notuð er aðallega sú að flugstjórar reyna yfirleitt að nota lengstu braut viðkomandi vallar. Ef þessu er breytt þannig að austur-vestur-brautin verði lengst verður hún sjálfkrafa langmest notuð auk þess sem hún liggur við algengastu vindáttum og hvassviðum svæðisins. Lenging austur-vestur-brautarinnar svo að hún verði aðalbraut vallarins er ein og sér sú breyting sem er til langmestra bóta fyrir notagildi flugvallarins og til að tryggja stórminnkað ónæði af honum, sama hvernig aðrar brautir vallarins liggja.

Hugmyndina um lengingu austur-vestur-brautarinnar orðaði Agnar Koefoed-Hansen þáverandi flugmálastjóri, í Morgunblaðsviðtali 1956. Útfærsla mín er 50 ára gömul hugmynd um málamiðlun varðandi Reykjavíkurflugvöll til að koma til móts við kröfur um aukna íbúðabyggð en bæta jafnframt notagildi vallarins. Hún hefur þessa aðalkosti:

1. Í stað þess að aðalbraut flugvallarins sé núverandi norður-suður-braut með tilheyrandi ónæði fyrir byggð í Kvosinni og á Kársnesi, sem fluguferð hennar veldur, hyrfi slík flugumferð að mestu ef brautin yrði í burtu og austur-vestur-brautin lengd til vesturs.

2. Aðalbrautin verði í staðinn lengri austur-vestur-braut, sem lægi út í Skerjafjörð, en Suðurgatan sett undir hana og göngu/hjólastígur yrði svipaður og nú er við Nauthólsvík. Flugumferð um þessa braut yrði yfir sjó að vestanverðu en yfir Fossvogsdal að austuanverðu.

3. Af því að brautin yrði lengd til vesturs myndi flugtak til austurs verða mun öruggara en nú, flugvélar í flugtaki til austurs myndu fara mun fjær Öskjuhlíðinni og Háskóla Reykjavíkur á loft og ná meiri hæð yfir Hlíðarfótinn og Fossvogsdal.

4. Vandamálið vegna hækkandi skógar í Öskjuhlíðinni leystist sjálfkrafa.

5. Lenging austur-vestur-brautarinnar á sér litlar takmarkanir, gæti þess vegna orðið uppí meira en 2 kílómetra lengd með tilheyrandi hagræði fyrir völlinn sem varaflugvöll fyrir Keflavíkurflugvöll eða til notkunar fyrir takmarkað milliandaflug.

6. Með því að taka núverandi norður-suður-braut í burtu og gera aðra minni braut ca 1000-1200 m langa mitt á milli hennar og núverandi "litlubrautar", sem tekin yrði í burtu, er hægt að stækka íbúðabyggðina í Skerjafirði og losa rými fyrir byggð þar sem suðurendi núverandi norður-suður-brautar er nú. Skýli 3 myndi halda sér og þar rísa miðstöð Landhelgisgæslunnar en á núverandi lóð hennar koma byggð. (Norðurendi nýju brautarinnar er við austurendann á Skýli 4 og suðurendinn rétt austan við byggingar olíustöðvar Skeljungs. Bein lína frá henni til norðurs yfir Arnarhól og utan við Kársnesið.)

7. Flugumferð varðandi þessa braut lægi fyrir utan Kársnesið en ekki yfir það.

8. Ókostur núverandi norður-suður-brautar er sá, að hún gagnast ekki í hvassri suðvestanátt og stefna hennar er ekki nógu þvert á austur-vestur-brautina. En með því að gera nýja og styttri norður-suður-braut ca 1000-1200 m. langa og leggja núverandi "litlu braut" niður fæst fram braut með hagkvæmustu stefnu varðandi hvassar sunnan-suðvestanáttir.

9. Þessi braut yrði aðeins notuð þegar vindur er mikill og flugvélar myndu því fljúga að henni og frá henni mun brattar en ella. Galli við þessa nýju braut yrði sá að aðflugs- og fráflugsferill til norðurs lægi yfir Arnarhól og yrði flugferillin að vera með beygju til norðurs. Það er alveg framkvæmanlegt.

Ekki yrði rými fyrir sérstakar akstursbrautir meðfram austur-vestur-brautinni. Einnig þyrfti að færa nokkur íbúðahús sem nú standa meðfram brautinni að norðanverðu svo að brautin stæðist kröfur um varaflugvöll fyrir millilandaflug.

Það má setja það fram sem galla við þessa hugmynd að hún kosti peninga. En það má fara í þetta í áföngum og byrja á að lengja austur-vestur-brautina og taka hitt síðar. Aðalatriðið er að sýna framsýni og eyðileggja ekki í fljótræði möguleika á mismunandi lausnum."