Kiel komið á toppinn

Lærisveinar Alfreðs Gíslasonar hjá Kiel eru komnir með yfirhöndina í slagnum gegn Rhein-Neckar Löwen um þýska meistaratitilinn.

Kiel vann í dag öruggan útisigur, 23-32, á Björgvini Páli Gústavssyni og félögum í Magdeburg. Staðan í hálfleik var 10-18.

Kiel hefur þar með náð eins stiga forskoti á Löwen og liðin eru búin að spila jafn marga leiki. Er það í fyrsta skipti í vetur sem Kiel nær yfirhöndinni í þessum bardaga.

Aron Pálmarsson skoraði þrjú mörk fyrir Kiel í leiknum en Guðjón Valur Sigurðsson eitt. Björgvin Páll Gústavsson varði fimm skot fyrir Magdeburg, þar af eitt víti.