Mikið óveður: Hellisheiðin og Þrengslin eru lokuð

Veður fer nú mjög versnandi á Suður- og Suðvesturlandi og búið er að loka bæði Hellisheiði og Þrengslum og umferð gengur hægt um Reykjanesbraut þar sem skyggni er afleitt þótt brautin teljist fær. Búið er að loka Vesturlandsvegi.

Víða er bál hvasst á Suðurströndinni og fór vindur til dæmis upp í 47 metra á sekúndu í hviðu á Steinum, undir Eyjafjöllum um klukkan fimm í morgun, en það jafngildir vindstyrk í þriggja stiga fellibyl.

Klukkan sex mældist meðalvindhraði á Stórhöfði í Vestmannaeyjum 39 metrar á sekúndu og fór upp í 48 í hviðum, og það er að hvessa víðast hvar á Suðvesturlandi með snjókomu, sem hefur aukist með morgninum.

Slys varð í Kömbunum um klukkan fimm í morgun þegar jepplingur fór þar út af veginum og ökumaður meiddist á höfði. Hann var fluttur á sjúkrahúsið á Selfossi, enda orðið ófært til Reykjavíkur.

Það hefur líka hvesst mikið á Vestfjörðum í nótt og snjóað töluvert, þannig að þar eru fjallvegir að líkindum ófærir. Vindur á Þverfjalli í grennd við Ísafjarðarkaupstað hefur mælst 28 metrar á sekúndu.

Björgunarsveitarmenn frá Hólmavík eru nú á Þröskuldum til að sækja tvo menn, sem hafa setið í föstum bíl sínum þar frá því um miðnætti. Þar er stórhríð og afar lítið skyggni og ekki vitað hvenær björgunarmennirnir verða komnir að bílnum, en ekkert amar að mönnunum þar sem nægt eldsneyti er á bílnum og því hafa þeir hita. Annars hefur umferð á þjóðvegum verið í algjöru lágmarki í nótt samkvæmt teljurum Vegagerðarinnar.

Að sögn Veðurstofunnar er heldur að bæta í vind og snjókomu á Suðvesturhorninu þannig að það stefnir að samgöngur raskist. Annars er spáin að það verði stormur, eða yfir 20 metra á sekúndu sunnan- og vestan til á landinu í dag.- Skaplegra veður er á norðan- og austanverðu landinu, þótt þar sé víða allhvasst.

Öllu innanlandsflugi Flugfélags Íslands hefur verið frestað og er næsta athugun upp úr klukkan níu og aðeins 62 fiskiskip eru á sjó við landið, flest eða öll í vari fyrir óveðrinu.

Þá fellur fyrri ferð Herjólfs niður í dag.