Refaveiðimenn segjast hafa skotið refi í öðrum sveitafélögum

„Sum sveitarfélög hafa verið að greiða þrefalt á við þær greiðslur sem Ísafjarðarbær hefur verið að greiða. Það er mjög gott mál að allir fái það sama og sitji við sama borð," segir Valur Richter, formaður félags refa- og minkaveiðimanna á Vestfjörðum, í samtali við fréttavefinn Bæjarins bestu.

Greinargerð frá umhverfis- og samgöngunefnd Alþingis um þingsályktunartillögu um breytta framtíðarskipan refaveiða á Íslandi hefur verið send Ísafjarðarbæ til umsagnar.

„Undanfarin ár hafa greiðslur vegna grenjavinnslu verið mjög misjafnar milli sveitarfélaga. Þetta hefur gert það að verkum að refaveiðimenn segjast gjarnan hafa skotið refinn í þeim sveitarfélögum þar sem hærra gjald er greitt fyrir hvert veitt dýr," segir í greinagerðinni.

Veiðimenn á Ísafirði fá 7000 krónur fyrir hvern unninn ref sem Valur segir ekki mikla hvatningu til þess að fara í lengri veiðiferðir.

„Ef ég fer í útkall í Arnarfjörð, í kringum Dynjanda, þá þarf ég að keyra 200 kílómetra til að komast þangað og eyða fimm til sex tímum í að ná tófu. Það er ekki hátt tímakaupið ef greiðslan dugir fyrir olíunni," segir Valur.

Þingsályktunartillagan hljóðar upp á að sama verð verði greitt fyrir refa- og minnkaveiðar um allt land. Jóhann Birkir Helgason, sviðstjóri framkvæmda- og rekstrarsviðs Ísafjarðarbæjar, segir tillöguna ósanngjarna að vissu leyti.

„Þar sem byggð er mjög strjálbýl er mikill akstur sem fylgir veiðunum. Umhverfisstofnun hefur gefið út gjaldskrá sem hefur ekkert hækkað í mörg ár og er auðvitað allt of lág. Það þarf líka að vera greitt kílómetragjald því annars eru bara vandræði að fá menn í þetta," segir Jóhann Birkir í samtali við BB.is.