Sátu föst í átta klukkutíma

Tveir fullorðnir og fjögur börn sátu föst í tveimur jeppum við Skjaldbreið í nótt. Lögreglunni á Selfossi barst tilkynning um að þau hefðu fest sig um hálf tíu í gærkvöldi og voru björgunarsveitir á Suðurlandi kallaðar út.

Langan tíma tók hins vegar að finna bílana þar sem lélegt símasamband var á svæðinu og var þyrla Landhelgisgæslunnar kölluð út en þurfti síðan að snúa við vegna þoku.

Bílarnir fundust síðan um klukkan hálf fjögur og tókst björgunarsveitum að losa þá rétt fyrir klukkan sjö í morgun en þá var fólkið búið að sitja fast í yfir átta klukkustundir.

Fólkið var að sögn lögreglu ágætlega búið og ekki væsti um þau í bílunum.