Hanna Birna: Ég kom ekki nálægt þessari könnun

Hanna Birna Kristjánsdóttir segist ekki hafa vitað af eða staðið fyrir könnun sem Capacent Gallup framkvæmdi fyrir óþekktan hóp á dögunum, þar sem yfir 80 prósent aðspurða telja að hún yrði sterkari leiðtogi Sjálfstæðisflokksins en Bjarni Benediktsson, núverandi formaður.

Hanna Birna var gestur Sigurjóns M. Egilssonar í þættinum Á Sprengisandi á Bylgjunni í morgun. Á föstudag birtust niðurstöður úr netkönnun sem félagskapur sem kallar sig „Samtök áhugafólks um stjórnmál" lét framkvæma á dögunum. Ekki er vitað hverjir standa bak við hópinn, en því hefur verið haldið fram í fjölmiðlum að líklegt sé að hópurinn sé hliðhollur Hönnu Birnu.

Hún kannast ekkert við það.

„Ég hafði ekki hugmynd um þessa könnun og heyrði í fyrsta skipti af henni hér í fréttum hjá ykkur, hafði ekki hugmynd um að það hafi verið að gera hana. (...) Ég held að þetta sé ekki bara, og ég hef oft sagt það áður, mjög einlæg aðdáun almennings á mér, ég held að þetta sé vilji almennings til að gera ákveðnar breytingar sem ég hef talað fyrir og finnst skipta miklu máli. Ég var búin að taka þá ákvörðun að fara í varaformanninn, það er nokkuð síðan að ég lokaði þeirri ákvörðun í mínum huga. Og ég er mörgum sinnum búin að segja það, ég sagði það á síðasta landsfundi þegar ég gaf kost á mér, ég sagði það eftir síðasta landsfund eftir að ég hafði tapað fyrir Bjarna Benediktssyni og sagði það eftir prófkjörið í Reykjavík, að ég færi ekki aftur í Bjarna Benediktsson - ég myndi ekki gefa kost á mér inn á landsfundi gegn honum og það hefur ekkert breyst í því," sagði Hanna Birna.

Sverðu af þér að hafa vitað eða staðið fyrir þessari könnun?

„Ég kom ekki nálægt þessari könnun og veit ekkert, frekar en nokkur annar, hver kom að henni," sagði hún.

Hægt er að hlusta á viðtalið við Hönnu Birnu hér að ofan.