Eins og á Norðurpólnum

Að minnsta kosti fjórir eru látnir og mörg hundruð þúsund eru án rafmagns á norðausturströnd Bandaríkjanna og í Kanada þar sem mikið hríðarveður hefur geisað. Íslendingar vestanhafs sem fréttastofa náði tali af í dag hafa haldið sig innandyra síðasta sólarhringinn.

Rekja má fjögur dauðsföll í umferðinni til óveðursins vestanhafs í dag, eitt í Bandaríkjunum og þrjú í Kanada. Neyðarástandi hefur verið lýst yfir í sex ríkjum á Austurströnd Bandaríkjanna og hafa íbúar þar verið beðnir um að halda sig innandyra enda er um áttatíu sentimetra jafnfallinn snjór víða og vindhraðinn hefur farið upp í allt að 34 metra á sekúndu.

Um sexhundruð og fimmtíu þúsund eru nú án rafmagns og hafa samgöngur víða farið úr skorðum. Yfir fimmþúsund og þrjúhundruð flugferðum hefur verið aflýst í dag, þar á meðal flugi Icelandair frá Boston og New York í morgun og hefur umferð víða verið bönnuð nema í neyðartilfellum.

Árni Kristjánsson og fjölskylda hans sem býr í Connecticut líkja ríkinu nú við Norðurpólinn en þar hefur nánast snjóað látlaust síðan í gær.

„Það er bara mikill snjór og háir skaflar. Yfirleitt þegar kemur svona mikill snjór hérna er ekki svo mikill vindur með þessu, en það var núna. Það er allt gjörsamlega ófært hérna úti. Það er ekki einu sinni byrjað að hreinsa veginu. Þegar snjókoman hættir, þá kíkir maður út," segir Árni.

Ragna Sif Þórarinsdóttir, nemi í Boston, hefur nánast sömu sögu að segja.

„Það var enginn skóli í gær og heimavistin lokuð," segir hún.