Lítil telpa hætt komin í rúllustiga

Litlu munaði að illa færi þegar lítil telpa festi stígvélið í rúllustiga í verslunarmiðstöð á höfuðborgarsvæðinu á dögunum, samkvæmt Herdísi L. Storgaard, Verkefnastjóri barnaslysavarna.

Slysið varð þegar að barnið og móðir þess voru að fara niður stigann og stóð telpan í þrepinu fyrir neðan móður sína. Skyndilega byrjar barnið að æpa og verður móðir hennar þá vör við það að efrihluti annars stígvélisins er fast á milli þrepa og hún sér hvernig stígvélið spænist upp.

Móðir telpunnar skimar eftir neyðarhnapp til að stoppa stigann en sér hann hvergi. Á endanum togar hún telpuna upp og fótur hennar losnar úr stigvélinu.

Telpan hlaut minniháttar áverka.

Slys af þessu tagi eru algeng - og eru sambærileg slys orðin á þriðja tug á rúmum 20 árum - að sögn Herdísar. Hún segir að í samtali sínu við móður stúlkunnar hafi komið fram að hún áttaði sig ekki á því að gul lína er á þrepinu, en telpan stóð einmitt með fótinn sem festist inni á gulu línunni.

Að mati Herdísar ættu að vera leiðbeiningar við rúllustiga sem útskýra tilgang gulu línunnar, sem þýðir að viðkomandi má ekki standa á henni eða fyrir innan.

Herdís segir að það séu ekki gular línur í öllum stigum, sem getur valdið misskilningi, að hennar mati.

Einnig eru aðvaranir mjög misjafnar og stundum lítt áberandi að mati Hedísar. Hún spyr hvort það sé ekki hægt að merkja betur hvar neyðarhnappar eru staðsettir til þess að stöðva rúllustigann.

Þá beinir Herdís þeim tilmælum til foreldra að börn ættu aldrei að vera ein að leik í rúllustigum og að það er ekki heimilt að fara með kerrur í stiga af öryggisástæðum.