Hópnauðgunin kærð til lögreglu í dag

Karlmaður sem tilkynnti lögreglu að sér hefði verið nauðgað við Hörpu um helgina mun leggja fram formlega kæru til lögreglu núna eftir hádegi. Þetta staðfestir Björgvin Björgvinsson, aðstoðaryfirlögregluþjónn í samtali við Vísi. „Lögreglan kom að þessu núna um helgina og það verður tekin formleg kæra núna eftir hádegi," segir Björgvin.

Fréttavefur DV fullyrti fyrr í dag að gerendurnir hefðu verið fjórir en Björgvin segist ekki geta staðfest það. „Það er óljóst, en hann talaði um það þegar lögreglan kom að það hefðu verið fleiri en einn," segir Björgvin í samtali við Vísi.

Björgvin segir að maðurinn hafi leitað á neyðarmóttöku fyrir þolendur kynferðisbrota á Landspítalanum. „Hann fór á neyðarmóttöku og gekkst undir rannsókn en fór heim eftir þá rannsókn," segir Björgvin.