Segja geislun frá farsímum ekki skaðlega

Geislun frá farsímum, farsímamöstrum og staðarnetum, eins og þráðlausum netum á heimilum, hefur ekki skaðleg áhrif á heilsu fólks. Þetta kemur fram í sameiginlegri yfirlýsingu norrænu geislavarnastofnanna, eftir að þær fóru yfir niðurstöður rannsókna sem birst hafa í vísindaritum hingað til.

Þó eru faraldsfræðilegar rannsóknir á langtímaáhrifum vegna farsímanotkunar enn takmarkaðar og þá sérstaklega á rannsóknir á börnum og unglingum.

„Frá því um 1990 hefur notkun farsíma farið sívaxandi og þráðlaus samskipti eru nú hluti af daglegu lífi flestra íbúa Norðurlanda. Þráðlaus samskiptatækni er notuð til að flytja símtöl og textaskilaboð en einnig til að senda margvísleg gögn,“ segir í yfirlýsingu norrænna geislavarnastofnana.

„Hópar sérfræðinga, bæði frá einstökum löndum og alþjóðlegir, hafa reglulega farið yfir greinar sem birst hafa í vísindaritum til að meta hvort komið hafi fram vísbendingar um hættu á krabbameinum eða öðrum langvinnum sjúkdómum vegna geislunar við þráðlaus samskipti.“

Hópur sérfræðinga á vegum Alþjóðakrabbameinsstofnunarinnar birti í maí 2011, niðurstöður og flokkuðu geislun frá fjarskiptatækni sem hugsanlega krabbameinsvaldandi í mönnum. „Þessi flokkun var aðallega byggð á niðurstöðum nokkurra faraldsfræðilegra rannsókna sem gáfu til kynna aukna hættu á krabbameinum í heila meðal fullorðinna farsímanotenda.“

Síðan þá hafa verið birtar niðurstöður faraldsfræðilegra rannsókna sem sýna ekki að farsímanotkun auki áhættu á æxlum hjá notendum. Þó er enn of snemmt að draga afdráttarlausar ályktanir um hættu á heilaæxlum hjá börnum og unglingum.

„Nýjar faraldsfræðilegar rannsóknir hafa einnig beinst að öðrum áhrifum á heilsu en myndun krabbameina. Einhver slík áhrif hafa komið fram en takmarkanir á aðferðarfræði rannsóknanna koma í veg fyrir að hægt sé að draga afdráttarlausar ályktanir um orsakatengsl. Rannsóknir um tiltekin áhrif eru einnig fáar og því ekki hægt að staðfesta niðurstöðurnar.“

Nýlegar kannanir sýna að þrátt fyrir að mikil aukning hefur verið á notkun þráðlausra samskipta, hefur geislun frá staðarnetum á svæðum ætluðum almenningi utandyra, sem og innanhúss í skólum, skrifstofum og hýbýlum fólks haldist langt undir viðmiðunarmörkum.