"Finnum að við erum ekki ein í þessu“

Fáum miklu meiri aðstoð hér á landi en í Póllandi segja foreldrar annarar stúlkunnar sem lést í bílslysi á Suðurlandsvegi síðastliðinn sunnudag. Sett hefur verið af stað söfnun til að aðstoða fjölskyldur stúlknanna við að koma þeim til Póllands, þar sem þær verða jarðsettar.

Stúlkurnar tvær Magdalena Hyz, sextán ára og Natalia Gabinska, fimmtán ára, voru á ferðalagi með móður þeirrar síðarnefndu og kunningja hennar þegar slysið varð síðastliðinn sunnudag. Stúlkurnar létu báðar lífið en móðirinn og maðurinn, sem ók, komust bæði lífs af. Þær voru í heimsókn hér á landi og var þetta önnur ferð Nataliu til Íslands, en móðir hennar er búsett hér. Magdalena var í heimsókn hjá frænku sinni og var hún á landinu í fyrsta skipti auk þess sem þetta var hennar fyrsta ferð utan landsteina Póllands.

Foreldrar Magdalenu segja  hana hafa verið yndislega stúlku sem hafði mikinn áhuga á íþróttum og þá sérstaklega fótbolta og blaki. Hún lauk grunnskólagöngu sinni á þessu ári og var á leið í menntaskóla í haust. Magdalena var mjög spennt fyrir þessari fyrstu utanlandsferð sinni. „Hún kom til frænku sinnar, vildi skoða heiminn og það gerðist sem gerðist,“ segir Ana Hyz, móðir hennar.

Samkvæmt upplýsingum frá vakthafandi lækni á gjörgæsludeild Landspítalans er maðurinn sem ók alvarlega slasaður og er honum enn haldið sofandi í öndunarvél. Ástand móður Nataliu er að sögn vinkonu hennar betra og segir hún hana líklega losna af spítala í dag. „Ástand hennar er betra, það er enginn skaði í heilanum eða höfðinu. Andleg heilsa hennar er aftur á móti hræðileg,“ segir Sylwia Burzykowska, vinkona móður Nataliu.

Stúlkurnar verða báðar jarðsettar í heimalandi sínu og fylgir því mikill kostnaður að flytja lík þeirra til Póllands, en hann getur hlaupið á milljónum króna. Fjölskyldurnar hafa sett af stað söfnun í nafni stúlknanna til þess að reyna að standa straum af kostnaðinum og Anna segir þau vanta aðstoð og að þau fái meiri aðstoð á Íslandi en í Póllandi.

Fjölskyldurnar eru þakklátar fyrir þann stuðning sem þeim hefur verið sýndur og segir Agnieszka Hyz, frænka Magdalenu, að þau finni fyrir því að þau séu ekki ein í þessu. „Við erum mjög þakklát,“ segir hún.

Þeir sem vilja styrkja fjölskyldurnar geta lagt inn á reikning 0130-05-061895, kt. 200579-4029.