Íslenski milljónamæringurinn þarf ekki að borga skatt af vinningnum

„Nei, hann er ekki búinn að gefa sig fram en ég býst við að hann láti vita af sér í dag eða á morgun," segir Stefán Konráðsson, framkvæmdastjóri Íslenskrar getspár.

Í gærkvöldi datt Íslendingur heldur betur í lukkupottinn því hann var einn með allar tölurnar réttar í Víkingalottóinu. Hann fær því um 127 milljónir í sinn hlut.

Þetta er lang stærsti vinningur í sögu Íslenskrar getspár. Í fyrra komu þó tveir stórir vinningar, annar í október, 103 milljónir, og í mars 107 milljónir.

„Við hvetjum alla til að skoða miðana sína, en þetta getur tekið nokkra daga en þetta er svo svakalega há upphæð svo ég á von á því að hann komi á næstu dögum," Stefán.

Stefán segir að spilarinn fái vinninginn skattfrjálst, enda séu allir leikir hjá Íslenskri getspár skattfrjálsir.

Sá sem vann milljónirnar 127 var með miðann sinn í áskrift. Þá var líka heppinn íslenskur spilari sem vann 10 milljónir í bónusvinning, sá miði var keyptur í Hagkaup við Furuvelli á Akureyri.