Þorvaldur og Gunnlaugur skipta um starf

Þorvaldur Örlygsson, fyrrum þjálfari ÍA og Fram í Pepsi-deildinni síðasta sumar, var í kvöld ráðinn þjálfari 1. deildarliðs HK en þetta kemur fram á heimasíðu félagsins.

Gunnlaugur Jónsson og Þorvaldur skipta því um starf en Gunnlaugur kom HK upp í 1. deildina í sumar og tók síðan við liði ÍA. Bæði liðin spila í 1. deildinni næsta sumar og því mætast þeir Gunnlaugur og Þorvaldur með nýju liðin sín.

Þorvaldur skrifaði undir þriggja ára samning en auk þjálfunar meistaraflokks mun Þorvaldur koma að uppbyggingu elstu flokka HK. Þorvaldur er 47 ára gamall og er með UEFA-pro þjálfaragráðu frá Englandi.

"Við erum mjög ánægðir með að fá Þorvald sem þjálfara hjá HK. Með þessari ráðningu erum við að sýna að HK ætlar af fullum krafti í 1.deildina næsta keppnistímabil. Þorvaldur er reynslumikill þjálfari með mikinn metnað," sagði Þórir Bergsson formaður meistaraflokksráðs karla hjá HK í viðtali við heimasíðu félagsins.

HK verður fimmta félagið sem Þorvaldur þjálfar en hann var með KA frá 2000-2005, Fjarðabyggð frá 2006-2007 og þjálfaði síðan Fram frá 2008 til 2013. Þorvaldur tók síðan við Skagamönnum í júní þegar liðið var í erfiðri stöðu við botn úrvalsdeildarinnar. Hann hætti störfum á Akranesi í haust en Skagamenn féllu úr deildinni.