Aron og Emilía vinsælust í fyrra

Aron var vinsælasta eiginnafn nýfæddra drengja á árinu 2012 en Emilía vinsælasta stúlkunafnið. Bæði nöfnin voru einnig vinsælust á árinu 2011. Þetta kemur fram á vef Hagstofunnar.

Þór var langvinsælasta annað eiginnafnið hjá drengjum, en þar á eftir Logi og Ingi. Ósk var vinsælasta annað eiginnafnið hjá stúlkum ásamt Maríu, en þessi nöfn hafa vermt fyrsta og annað sætið undanfarin ár. Á eftir þeim kom stúlkunafnið Lilja sem þriðja vinsælasta síðara eiginnafn nýfæddra stúlkna.

Þegar litið er á allan mannfjöldann í ársbyrjun 2013 voru 10 vinsælustu einnefnin og fyrstu eiginnöfnin alveg þau sömu og árið 2008. Hjá körlum var Jón vinsælasta nafnið, þá Sigurður og svo Guðmundur. Tíu algengustu nöfnin hafa verið þau sömu frá 2008 nema hvað Kristján er nú í 7. sæti í stað Magnúsar sem færist niður um eitt sæti. Af kvenmannsnöfnum er Guðrún vinsælast, þá Anna og svo Kristín.

Flestir landsmenn bera fleiri en eitt nafn. Í ársbyrjun 2013 voru þrjár vinsælustu samsetningarnar hjá körlum Jón Þór, Gunnar Þór og Jón Ingi. Þetta voru einnig algengustu tvínefnin fimm árum fyrr. Hjá konum voru þrjár vinsælustu samsetningarnar Anna María, Anna Margrét og Anna Kristín. Þetta voru líka þrjú algengustu tvínefnin árið 2008. Kvenmannsnafnið Anna er hins vegar afar vinsælt sem fyrra nafn, en hún reyndist fyrra nafnið í sex af 10 algengustu tvínefnunum.