Ráðast í verkefni til að lyfta menntunarstigi Breiðhyltinga

Verkefni sem lýtur að hækkun menntunarstigs í Breiðholti er að hefjast. Um samstarf ríkisins, Reykjavíkurborgar og aðila vinnumarkaðarins er að ræða.

Verkefni af sama meiði hefur þegar verið hrint af stað í Norðvesturkjördæmi, en fjallað var um verkefnið í Breiðholti á fundi borgarráðs á fimmtudag. Markmiðið er að auka formlega menntun fólks sem og að viðurkenna færni sem fólk hefur aflað sér á lífsleiðinni. Markmiðið er ekki síst að ná til þeirra sem eru atvinnulausir, en stór markhópur þessa verkefnis eru fjölskyldur innflytjenda sem eru hlutfallslega flestar í Breiðholti innan hverfa Reykjavíkurborgar.

Dagur B. Eggertsson, formaður borgarráðs, segir verkefnið beinast að þeim sem hafa ekki lokið formlegri menntun eftir grunnskólapróf og gera þeim unnt að bæta við sig. Ísland standi sig illa á þessu sviði, eins og greiningar sýna og yfir 30% fólks á vinnumarkaði eru aðeins með grunnskólapróf. „Þetta er neikvætt fyrir atvinnulífið, en ekki síst fyrir þessa einstaklinga sem eiga í hlut því reynslan sínir að samdráttur á atvinnumarkaði bitnar hart á þeim hópi.“

Dagur hefur orð á því, í ljósi mikilvægis verkefnisins, hversu mikilvægt það er að verkefni sem þetta lendi ekki undir niðurskurðarhnífnum, en það er fjármagnað af ríkinu að mestu. 

Í greinargerð, sem lögð var fram í borgarráði á fimmtudag, eru nefndar ástæður fyrir því að verkefnið snýr að Breiðholti. Þar kemur fram að menntunarstig er lægra í Breiðholti en á flestum öðrum stöðum hér á landi, en samkvæmt tölum Hagstofunnar er ríflega þrefaldur munur miðað við meðaltal. 

Þá er svæðisbundið atvinnuleysi í Breiðholti með því hæsta hér á landi. Munurinn er allt að tvöfaldur miðað við ýmis önnur hverfi borgarinnar. Ein helsta ástæðan fyrir verkefninu er að í þessu stærsta hverfi borgarinnar búa flestar fjölskyldur innflytjenda. „Er til dæmis líklegt að innflytjendur sem eiga í mestum vanda vegna atvinnuleysis, verði stór markhópur þessa menntaverkefnis enda mælist atvinnuleysi meira hjá innflytjendum,“ segir þar.

Verkefnið hefst með ráðningu verkefnisstjóra sem starfar með hverfisstjóra Breiðholts og hóps sem heldur utan um framkvæmdaþátt verkefnisins. Ráðnir verða til starfa náms- og starfsráðgjafar. Við þær ráðningar verður horft til ráðgjafa af erlendum uppruna sem endurspegla fjölmennustu innflytjandahópanna í hverfinu.