Stöð 3 fer í loftið í kvöld: "Ég verð bara að taka þetta á temmilegu kæruleysi"

Það er óhætt að hlakka til vetrarins, því í kvöld hefur göngu sína ný og fersk sjónvarpsstöð, Stöð 3. Í boði verður erlent gæðaefni í bland við nýtt íslenskt og má nefna matreiðsluþátt með Evu Laufeyju Kjaran og þáttinn Í makaleit, þar sem fylgst verður með Íslendingum sem þrá meiri rómantík og losta í líf sitt.

Til að fagna nýju stöðinni verður glæsilegri skemmtidagskrá sjónvarpað frá Kex hosteli í opinni dagskrá frá klukkan níu í kvöld og gestgjafinn Friðrik Dór var vel stemmdur fyrir kvöldið. „Ég hef aldrei verið í sjónvarpi áður en ég lofa miklu stuði og fagmennsku í minni framkomu,“ segir Friðrik. Hann játar því aðspurður að umræður séu í gangi um að hann taki að sér að stýra sjónvarpsþætti á Stöð 3.

Var kannski draumurinn alltaf að verða sjónvarpsstjarna?

„Nei, ég get nú ekki sagt að það hafi alltaf verið draumurinn en það er mjög áhugavert verkefni og ég hlakka mikið til að spreyta mig á því. Vonandi gengur það vel. Ég verð bara að taka þetta á temmilegu kæruleysi,“ segir hann.

Stöð 3 næst um allt land og verður öllum opin fyrstu vikuna. Hægt er að kaupa áskrift á netsíðunni stod3.is fyrir 2.990 kr. á mánuði og áskriftinni fylgir aðgangur að Krakkastöðinni auk þriggja mánaða áskriftar að tónlist.is.

Stöð 3 fylgir frítt með áskrift að Stöð 2 og til að viðskiptavinir nái inn stöðinni þurfa þeir að endurræsa myndlykla sína með því að taka þá úr sambandi. Áskrifendur með digital Ísland þurfa að velja "menu" á fjarstýringunni og velja þar sjálfvirka leit. Lykilorðið er 0000.