Enn í eigu kaupanda þótt seljandi vilji rifta

Skíðaskálinn í Hveradölum er enn eign samnefnds einkahlutafélags sem keypti skálann í september síðastliðnum en er ekki kominn aftur í hendur seljandans eins og sagt var í Fréttablaðinu í síðustu viku.

Frásögn Fréttablaðsins byggði á skráningu Skíðaskálans hjá Fasteignaskrá Íslands. Vegna mistaka þar var skálinn færður aftur yfir á félagið SHS-veitingar ehf. þann 11. janúar síðastliðinn. Byggði sú skráning á einhliða yfirlýsingu SHS-veitinga um riftun kaupsamningsins vegna vanefnda kaupandans sem láðst hafði að borga 6,5 milljóna króna afborgun 7. janúar.

Kaupandinn samþykkir hins vegar alls ekki riftun samningsins. Samkvæmt upplýsingum frá Sýslumanninum á Selfossi er kaupandinn því eigandi Skíðaskálans þar til úr riftunarmálinu hefur verið skorið.

Inga Lísa Sólonsdóttir, eigandi Skíðaskálans í Hveradölum ehf. kveðst nú vinna hörðum höndum að því að finna fjármagn til að ljúka kaupunum. Hún hafi enn á prjónunum ýmis áform um uppbyggingu starfsemi á svæðinu.