Ráðuneyti sendir mann til Davíðs

Utanríkisráðuneytið hefur ákveðið að senda íslenskan lögfræðing til Tyrklands til að afla upplýsinga og hjálpa Davíð Erni Bjarnasyni, sem hefur verið fastur í fangelsi í Antalya síðan á föstudag. Lögfræðingurinn fær vonandi að hitta Davíð á morgun.

„Hann kemur til með að útvega Davíð föt, nauðsynjar og pening og kanna hans mál,“ segir Ingibjörg Hafsteinsdóttir, móðir Davíðs. Hún segir að utanríkisráðuneytið sé að vinna mjög vel í máli hans en segir þennan tíma þó vera skelfilegan.

Enginn í fjölskyldu Davíðs hefur fengið að tala við hann síðustu daga, en Ingibjörg segist vita að hann sé í klefa með tveimur evrópskum mönnum, sem hafi verið hjálpsamir og góðir við hann.

Fyrir utan íslenska lögmanninn, sem vonast er til að hitti Davíð á morgun, hefur ræðismaður Íslands í Tyrklandi sent lögmann frá sér til Antalya. Hann kemur vonandi til Antalya í dag. Utanríkisráðuneytið segir að staðfest hafi verið að Davíð hafi fengið læknisskoðun og að í aðalatriðum ami ekkert að honum annað en að honum líði mjög illa í fangelsinu. Ekki hefur fengist staðfest hvenær fyrirtaka málsins fer fram, en vonast hefur verið til þess að það verði í dag.