Fylgi Sjálfstæðisflokks minnkar enn

Ný könnun MMR um fylgi stjórnmálaflokka var birt í dag og bætir Framsóknarflokkurinn við sig fylgi á meðan stuðningur við Sjálfstæðisflokkinn minnkar enn. Könnunin var framkvæmd á tímabilinu 7. til 12. mars 2013.

Fylgi Sjálfstæðisflokksins mældist 27,2% nú, borið saman við 28,5% í síðustu mælingu. Framsóknarflokkurinn heldur áfram að bæta við sig fylgi og stendur það nú í 25,9%, borið saman við 23,8% í síðustu mælingu. Stuðningur við önnur framboð ýmist stóð í stað eða breyttist lítillega. Stuðningur við ríkisstjórnina mælist nú 26,5%.

Lagðar voru allt að þrjár spurningar fyrir svarendur um stuðning þeirra við flokkana. Allir voru spurðir spurningar 1: „Ef kosið yrði til Alþingis í dag, hvaða flokk myndir þú kjósa?".

Þeir sem svöruðu „Veit ekki/óákveðin(n)" við spurningu 1 voru því næst spurðir spurningar 2: „En hvaða flokkur yrði líklegast fyrir valinu?". Ef aftur var svarað „Veit ekki/óákveðin(n)" þá voru þátttakendur að lokum spurðir spurningar 3: „Hvort er líklegra að þú kysir Sjálfstæðisflokkinn eða einhvern hinna flokkanna?".

Fjölda þeirra sem svaraði "einhvern hinna" í spurningu 3 var skipt milli annarra flokka en Sjálfstæðisflokksins í sama hlutfalli og fylgi þeirra var samkvæmt spurningum 1 og 2.

Samtals voru 79,9% sem gáfu upp afstöðu til flokka, aðrir kváðust óákveðnir (7,7%), myndu skila auðu (7,8%), myndu ekki kjósa (1,5%) eða vildu ekki gefa upp afstöðu sína (3,1%).