Íslendingar verðlaunaðir

Íslenskir vísinda- og tæknimenn eru meðal höfunda átta binda fræðsluverks um endurnýjanlega orku sem hlaut á dögunum hin viðurkenndu PROSE-verðlaun sem veitt eru fyrir stór alfræðirit. Verkið kom út í sumar kom út hjá Elsevier forlaginu í Oxford. Þetta er átta binda fræðsluverk um endurnýjanlega orku. Aðalritstjóri verksins var Ali Sayigh, prófessor hjá Háskólanum Southampton í Bretlandi. Verkið spannar alla endurnýjanlega orku og er heilt bindi í verkinu helgað jarðhita undir ritstjórn Þorsteins I. Sigfússonar, prófessors og forstjóra Nýsköpunarmiðstöðvar Íslands. Á fundi í Washington í vikunni tilkynnti Samband bandarískra útgefenda að verkið hefði hlotið hin viðurkenndu PROSE verðlaun sem veitt eru fyrir stór margra binda alfræðirit. Heildarverkið er á fimmta þúsund síður, bindið um jarðhita er 300 blaðsíður að stærð. Bindið er borið uppi af köflum rituðum af íslenskum vísinda- og tæknimönnum. Höfundar eru Guðni Axelsson, Brynhildur Davíðsdóttir, Ólafur Flóventz, Gylfi Páll Hersir, Kristján Sæmundsson, Sigrún N. Karlsdóttir, Halldór Ármannsson, Þráinn Friðriksson, Helga Kristjánsdóttir, Ásgeir Margeirsson og Þorsteinn I. Sigfússon. Meðal annarra höfunda i bókinni eru Ronald diPippo, Lad Rybach og John Lund. Landsbókasafn – háskólabókasafn hefur tekið verkið í safnkost sinn og verður það varðveitt á Íslandsdeild safnsins. Þorsteinn Ingi Sigfússon, ritstjóri jarðhitabindisins, sagði við kynningu á verkinu í Landsbókasafni að PROSE viðurkenningin væri kærkomin og bókin bæri vitnisburð um hvað íslenskir vísindamenn standi framarlega á þessu sviði.