Skapaði bara meiri stemningu

„Við bara stoppuðum og spóluðum til baka smástund og héldum svo áfram þar sem frá var horfið,“ segir Jóhanna Vigdís Arnardóttir, sem leikur Mary Poppins, um viðbrögð leikaranna við því þegar tölva fraus á frumsýningu söngleiksins í þann mund sem flugatriði Guðjóns Davíðs Karlssonar í hlutverki Berts átti að hefjast og stöðva þurfti sýninguna um stund. „Við sem vorum á sviðinu vissum auðvitað ekkert hvað var að gerast, en þegar við komumst að því vissum við að þetta var bara tímaspursmál og við gætum fljótlega haldið áfram.“

Tölvan var endurræst og sýningin hélt áfram eins og ekkert hefði í skorist. Töfin var um það bil fjórar mínútur og Mary Poppins sjálf fræddi áhorfendur um það að upp væri komið tæknivandamál sem ekki einu sinni hún gæti lagað. „Við reyndum að halda áfram eins og ekkert væri,“ segir Jóhanna Vigdís, „en það var bara ekki hægt þannig að við Bergur Þór Ingólfsson leikstjóri fengum sömu hugmynd samtímis og mættum bæði á svið til að útskýra fyrir áhorfendum hvert vandamálið væri. Því var vel tekið og ég held að áhorfendur hafi bara farið í enn þá meiri stemningu fyrir vikið.“

- fsb