Hanna snjóbretti fyrir Nikita

Signý Kolbeinsdóttir og Helga Árnadóttir hafa rekið hönnunarfyrirtækið Tulipop frá árinu 2010. Þær stöllur hlutu hvatningarverðlaun FKA í janúar fyrir að standa framarlega í íslensku viðskipta- og atvinnulífi, en vörur Tulipop seldar á Íslandi og víðsvegar um Evrópu. Á HönnunarMars kynntu þær til leiks snjóbretti sem þær hönnuðu fyrir útivistarfyrirtækið Nikita.

„Tulipop er ævintýraheimur, nánar tiltekið eyja þar sem 13 ólíkir karakterar búa. Við Helga höfum þróað úrval af skemmtilegum gjafavörum með þessum karakterum forgrunni eins og matarstell, ritafangalínu og lampa þar sem markmiðið er að ná til sem flestra aldurshópa. Einnig gáfum við út bókina Mánasöngvarann í samstarfi við rithöfundinn Margréti Örnólfsdóttir fyrir jólin þar sem persónurnar voru gæddar lífi", segir Signý Kolbeinsdóttir um hugmyndina á bak við Tulipop.

Hvernig kom samstarfið við Nikita til? „Ég hafði áður unnið nokkur „freelance" verkefni fyrir Nikita og við Helga ákváðum bara að spyrja hvort það væri ekki eitthvað sniðugt sem við gætum gert saman. Rúnar, sem er einn af stofnendum Nikita, stakk upp á snjóbrettum og við slógum til. Þetta var mjög skemmtilegt verkefni og við lítum á þetta sem gríðarlega stórt tækifæri fyrir Tulipop að komast inn á erlenda markaði."

Hvar og hvenær verður hægt að kaupa brettin? „Þau verður hægt að kaupa næsta vetur en við vitum í rauninni ekki nákvæmlega hvar brettin verða seld. Nikita er nú í eigu sportvörurisans Amer Sport, sem er einn stærsti íþróttavöruframleiðandi í heimi, þannig að brettin verða líklegast seld sem víðast í Evrópu, Asíu og Bandaríkjunum. Nikita vörurnar eru seldar í um 1500 búðum í 30 löndum, en það er ólíklegt að þau verði seld hér heima þar sem að starfsemi Nikita er alveg farin út fyrir landssteinanna."

Er eitthvað spennandi framundan hjá Tulipop? „Já, við erum að fara setja á markað nýjar týpur af melamine matarstellum sem hafa verið mjög vinsæl og svo ýmislegt sem ekki er hægt að greina frá að svo stöddu. En það er óhætt að segja að það sé margt spennandi í pípunum og skemmtilegir tímar framundan."

Hægt er að skoða meira um veröld Tulipop á tulipop.is og facebook.com/tulipop