Umfjöllun, viðtöl og einkunnir: Valur - Stjarnan 1-1 | Tíu Valsarar náðu í stig

Valur og Stjarnan skildu jöfn 1-1 á Vodafone vellinum að Hlíðarenda í kvöld í Pepsí deild karla í fótbolta þar sem Stjarnan var einum leikmanni fleiri frá 11. mínútu.

Stjarnan hóf leikinn mun betur og nýtti sér það vel að Valur átti í miklum vandræðum með að halda boltanum innan liðsins fyrstu mínútur leiksins.

Sókn Stjörnunnar þyngist þar til Ólafur Karl Finsen komst í færi á 11. mínútu sem Fjalar Þorgeirsson markvörður Vals varði. Ólafur náði aftur til boltans og féll í teignum eftir viðskipti við Fjalar með þeim afleiðingum að Garðar Örn Hinriksson dómari dæmdi víti og rak Fjalar af velli.

Halldór Orri Björnsson skoraði úr vítinu og auðveldur leikur virtist blasa við Stjörnunni. Svo fór þó ekki því í stað þess að láta kné fylgja kviði slakaði Stjarnan á klónni og bauð upp á einhæfan sóknarleik sem einskoraðist við að senda boltann langt fram. Liðið notaði breidd vallarins lítið sem ekkert og skapaði sér örfá færi.

Valsmenn sköpuðu sér engin færi í fyrri hálfleik en í seinni hálfleik var Vals liðið mun betri aðilinn í leiknum. Haukur Páll Sigurðsson og Daniel Craig Racchi fóru á kostum á miðjunni og stjórnuðu gangi leiksins.

Stjarnan gerði lítið sem ekkert fram á við og ekki hjálpaði að liðið þurfti að gera tvöfalda skiptingu í hálfleik þar sem bættist á langan meiðsla lista félagsins.

Manni færri náði Valur nokkrum sinnum að koma sér í góða stöðu en liðið fékk ekki mörg færi. Liðið náði þó að jafna 19 mínútum fyrir leikslok eftir skyndisókn sem virtist vera að renna út í sandinn en Daniel Craig Racchi átti þá frábæra sendingu á Indriða Áka Þorláksson sem skoraði í öðrum leiknum í röð og tryggði Val fyllilega verðskuldað stig.

Eitt stig hjálpar hvorugu liðinu í topp baráttunni en Stjarnan er sem fyrr í 3. sæti deildarinnar en sex stigum frá toppnum. Valur er fjórum stigum á eftir Stjörnunni í 5. sæti.

Magnús: Þýðir ekki að væla yfir dómaranum„Við vorum smá hikstandi þarna í upphafi og svo kom eitthvað vafa atriði þarna. Ég sá reyndar ekki hvað gerðist en mér fannst vera hendi á Stjörnumanninn rétt áður en þeir fengu vítið,“ sagði Magnús Gylfason þjálfari Vals í leikslok.

„Ef það er brotið einn á móti markmanni þá er það rautt spjald en ég veit ekki hvort hann fór í hann. Vonandi fyrir dómarans hönd var hann ekki að gera mistök þarna en við hefðum líka getað fengið víti þegar það var keyrt í bakið á Hauk inni í teignum. Mér fannst þeir ekki eiga sinn besta leik í dag en þýðir eitthvað að væla yfir dómaranum,“ sagði Magnús sem náði að kveikja vel í sínum mönnum í hálfleik því Valur var mun betri aðilinn í seinni hálfleik.

„Við ákváðum halda skipulaginu og pressa stíft á boltann. Þeir spila nokkuð norskt, dúndra fram á Garðar eða Tryggva. Við vissum af því og við hefðum átt að bregðast aðeins betur við því í upphafi leiks en í seinni hálfleiks vissum við hvað þeir voru að gera og við unnum boltann og héldum honum niðri, spiluðum út á kantana og fengum hlaup upp kantana.

„Við fengum extra hlaup frá öllum leikmönnum sem eftir voru inná, hálf meiddir sumir. Hreyfingin á mínum mönnum var mjög góð. Við létum boltann ganga og kannski vorum við betri en þeir. Viljinn var alla vega okkar megin. Ég er mjög stoltur af mínum mönnum í kvöld. Við gerðum allt sem við gátum og náðum þessi stigi sem gæti verið dýrmætt einhvern tíman,“ sagði Magnús.

Logi: Ekki ætlunin að senda eingöngu háa bolta„Við höldum þessu nokkuð vel þar til jöfnunarmarkið kemur. Það er kannski ekki mikil hætta á ferðum þegar markið kemur en menn sofna algjörlega á verðinum,“ sagði Logi Ólafsson þjálfari Stjörnunnar.

„Það hefði verið átt að fara héðan með 1-0 en það er erfitt að spila á móti liðum sem lenda í þessu og fara aftar á völlinn og leggja mikið á sig á meðan við slökum á. Þetta endar í því að við setjum langa bolta fram sem er ekki ætlunin í upphafi.

„Við erum með leikmenn sem geta haldið boltanum mun betur innan liðsins og við náðum því ekki og þess vegna gátum við ekki nýtt okkur liðsmuninn. Ef við spilum boltanum ekki á milli okkur og látum þá hlaupa þá er uppskeran rýr. Einum fleiri í 80 mínútur og eitt stig.

„Það var ekki ætlun okkar að senda eingöngu háa bolta fram. Menn eru eitthvað hræddir við að halda boltanum og láta hann ganga og ég held að það hafi fyrst og fremst orðið okkur að falli,“ sagði Logi.

Stjarnan hefur náði í tvö stig í þremur síðustu leikjum sínum í deildinni sem er ekki nóg fyrir lið í baráttu í Íslandsmeistaratitilinn. Liðið er komið í bikarúrslit sem leikinn verða á laugardaginn og spurning hvort bikarleikurinn hafi truflað liðið að undanförnu.

„Fyrst það eru ekki fleiri leikir fram að bikarúrslitum þá vona ég að hann sé ástæðan og það er þá ekki hægt að tala um það eftir næstu helgi þegar sá leikur er búinn. Ég ætla að vona að hann sé ástæðan því ég hef áhyggjur af því að menn geti ekki spilað betri fótbolta en þetta,“ sagði Logi Ólafsson að lokum.