Víkingur Heiðar spilar fyrir fréttakonu Fox News

Píanóleikarinn Víkingur Heiðar Ólafsson er meðal þeirra listamanna sem koma fram á hinni mánaðarlöngu Nordic Cool listahátíð sem hófst í Kennedy Center í Washington í Bandaríkjunum í gær.

Yfir 700 listamenn koma fram á hátíðinni og er að finna fulltrúa frá Danmörku, Finnlandi, Noregi, Svíþjóð, Grænlandi, Færeyjum og Álandseyjum auk Íslandi.

Í frétt bandarísku sjónvarpsstöðvarinnar Fox er Víkingur Heiðar tekinn tali og spurður ýmissa spurninga. Fram kemur að Víkingur hafi byrjað að spila á píanó tveggja ára gamall og að móðir hans, Svana Víkingsdóttir, sé píanóleikari.

Þá er vitnað í afar góða umsögn London Times á Víkingi Heiðari sem upprennandi stjörnu og hann spurður hver hans viðbrögð séu við slíkri umsögn.

„Engin eiginlega. Þetta snýst bara um tónlistina og ég reyni að njóta hennar," segir Víkingur af sinni alkunnu hógværð. Sýnt er frá tónleikum Víkings með Sinfóníuhljómsveit Íslands og hann spurður út í hvernig hann nálgist tónleika frammi fyrir fullum sal af fólki.

Víkingur fagnar þeirri staðreynd að öll Norðurlöndin eigi fulltrúa á hátíðinni. Að lokum spilar Víkingur Ave Maria úr smiðju Sigvalda Kaldalóns sem Víkingur útsetti sjálfur fyrir píanó.

„Þannig þarf ég ekki að treysta á íslenskan söngvara þegar ég er á ferðalagi," segir Víkingur í gamansömum tón.

Viðtalið við Víking og flutning hans má sjá hér.

Víkingur spilaði Ave Maria einnig á opnunartónleikum Sinfóníuhljómsveitar Íslands í Eldborgarsal Hörpu sumarið 2011. Flutningin í heild sinni má sjá hér.

Fulltrúar ÍslandsAuk Víkings Heiðars koma Sinfóníuhljómsveit Íslands, Íslenski dansflokkurinn, leikhópurinn Vesturport, hljómsveit Sunnu Gunnlaugsdóttur djasspíanóleikara og Duo Harpverk fram á hátíðinni.

Dagskrá hennar og nánari upplýsingar má nálgast hér.