Fatlaðir á Suðurnesjum snuðaðir um 160 milljónir

Um 160 milljónir af skatttekjum eru teknar af Suðurnesjum í önnur sveitarfélög, þ.e. af skattfé sem renna átti úr Jöfnunarsjóði sveitarfélaga til málefna fatlaðra.

Þetta kemur fram í fréttatilkynningu frá starfsþróunarstjóra Reykjanesbæjar, en á vetrarfundi Sambands sveitarfélaga á Suðurnesjum á föstudag kom fram að í stað þess að ríkið leggi meira til málefna fatlaðra á Suðurnesjum, þar sem hlutfall öryrkja er hæst á landinu og skatttekjur lægstar, eru skatttekjur sem koma af svæðinu teknar og þeim endurúthlutað annað. Þannig vanti 160 milljónir króna til Suðurnesja í þágu málefna fatlaðra.

Árni Sigfússon bæjarstjóri Reykjanesbæjar staðfestir þetta og segir stjórn Sambands sveitarfélaga á Suðurnesjum sé með málið til athugunar og kallað verði eftir skýringum Jöfnunarsjóðs á misræminu.

„Þetta byggir á því að 1.2 prósent voru lögð á útsvar tekið af fasteignaskatti þegar málefni fatlaðra fóru yfir til sveitarfélaganna," segir Árni, en að sögn hans fer stærsti hluti þessa hlutfalls í Jöfnunarsjóð sem á síðan að „greiða út eftir þyngdarstigum og ákveðnum reiknireglum" en þær byggja meðal annars á mati á þjónustuþörf fatlaðra, svokölluðu SIS-mati.

„Jöfnunarsjóðurinn á svo að greiða þetta aftur út, en staðreyndin er sú að hér á Suðurnesjum, þar sem hlutfallslega eru flestir öryrkjar, þá vantar upp á að um 160 milljónir af þessum 1.2 prósentum skili sér til okkar. Þær eru þá greinilega að fara eitthvert annað."

Eðlilegt að fjármunum sé einfaldlega skilað

Árni segir það hafa dregist að framkvæma þjónustumat, en slíkt mat þarf að liggja fyrir á hverjum þeim sem fær þjónustu, en á sama tíma séu peningarnir ekki að skila sér.

„Það er eðlileg krafa að okkar mati að þessum fjármunum sé þá bara einfaldlega skilað, á meðan ekki er til fullkomnari leið til að reikna þetta út."

Árni bætir því við að þjónusta við fatlaða á Suðurnesjum hafi verið aukin, en um leið sitji sveitarfélögin þar eftir með aukinn kostnað sem ekki er leiðréttur í gegn um Jöfnunarsjóð.

„Það er til dæmis mikil þörf á bættum búsetuúrræðum fyrir fatlaða, sem felur í sér mikinn kostnað. Þú getur rétt ímyndað þér hvort 160 milljónir gætu ekki gert mikið fyrir svona samfélög þar sem búa 22 þúsund manns.