Tólf ára tekinn af lífi

Myndir sem sýna tólf ára gamlan dreng frá Sri Lanka fyrir og eftir dauða hans hafa litið dagsins ljós. Varað er við myndunum sem fylgja fréttinni.

Myndirnar af Balachandran Prabhakaran, syni Velupillai Prabhakaran foringja uppreisnarsveita Tamíl Tígra, voru teknar í maí 2009. Þá hafði ríkisstjórnin á Sri Lanka hrundið uppreisn Tígranna á bak aftur og um leið bundið endi á borgarastyrjöld sem staðið hafði í 26 ár.

Fyrri myndirnar tvær, hér að ofan og neðan, sýna drenginn í gæslu yfirvalda þar sem hann situr með teppi yfir axlir sínar og gæðir sér á einhverju matarkyns.

Á ljósmyndum sem teknar voru nokkrum klukkustundum síðar, á sömu vél að því er Dailymail fullyrðir, sést drengurinn á jörðinni, ber að ofan og með för eftir byssukúlur á brjóstkassa sínum. Sérfræðingar segja að drengurinn hafi verið skotinn af stuttu færi.

Myndirnar verða sýndar í heimildarmyndinni No Fire Zone sem frumsýnd verður á Mannréttindakvikmyndahátíð í Genf í næsta mánuði samhliða fundi Mannréttindaráðs Sameinuðu þjóðanna.

Stjórnvöld á Sri Lanka hafa ávallt haldið því fram að hinn tólf ára gamli Balachandran hafi látið lífið í skotbardaga. Callum Macrae, leikstjóri kvikmyndarinnar, segir þá staðhæfingu ekki geta átt við rök að styðjast.

„Sú staðreynd að aftakan var fest á filmu og myndirnar geymdar til minningar um sigur í stríðinu gerir þetta enn óþægilegra," segir Macrae við Independent.

Líkið af Prabhakaran eldri var sýnt í ríkissjónvarpinu á Sri Lanka í maí 2009 til marks um sigur stjórnvalda gegn uppreisnarhermönnum. Ýmislegt benti til þess að um aftöku hefði verið að ræða þar sem hluta af höfuðkúpu hans vantaði á líkið. Þótti það benda til skots af stuttu færi.

Brigadier Wanigasooriy, talsmaður hersins á Sri Lanka, segir ýmist um lygar, hálfsannleik eða orðróm að ræða. Hermenn voru sakaðir um brot á mannréttindum á síðustu dögum styrjaldarinnar. Var talið að kynferðisglæpir, morð og hvers slags misþyrmingar hefðu átt sér stað.

„Engin sönnunargögn liggja fyrir sem gefa ástæðu til rannsóknar," segir Wanigasooriy. Ban Ki-Moon, ritari Sameinuðu þjóðanna, birti skýrslu árið 2011 þar sem fram kom að allt að 40 þúsund manns hefðu látist á síðustu mánuðum styrjaldarinnar.