Vægari refsingar fyrir kannabisræktun

Kjartan Ægir Kristinsson, laganemi og lögreglumaður skrifaði BA ritgerð um það misræmi sem finna má í refsingum fyrir heimaræktun á kannabisefnum annarsvegar og innflutningi á kannabisefnum hinsvegar. Þar kemur meðal annars fram að aðeins einu sinni hefur ákæruvaldið talið að heimaræktun sé stórfellt fíkniefnabrot og það var fyrir mistök.

Aðeins ríkissaksóknari getur gefið út ákæru sem varðar við brot á 173 grein hegningarlaga sem er stórfellt fíkniefnabrot. Lögreglustjórar geta gefið ákæru er varða önnur brot á fíkniefnalöggjöfinni.

Ætla má að 12 kíló af kannabisefnum og 460 plöntur séu stórfelld fíkniefnabrot samkvæmt 173 grein hegningarlaganna. En það er þó ekki sjálfgefið því aldrei hefur verið gefin út ákæra hérlendis fyrir heimaræktun kannabisefna samkvæmt þessari grein utan einu sinni og það mun hafa verið fyrir mistök. Fullvíst má þó vera að ef reynt yrði að smygla 12 kílóum af kannabisefnum til landsins teldi ákæruvaldið að um stórfellt fikniefnabrot væri að ræða. Kjartan Ægir segir að þessu hefði hann komist við skrif ritgerðar sinnar.

"Úr niðurstöðum mínum í þessari ritgerð komst ég að því að 173.grein a hegningarlaganna hefur aldrei verið beitt vegna brota á heimaræktun kannabisefna nema í einu undantekningatilfelli. Það er því greinilegt að það er vægari refsing við því að rækta hér heima en að flytja inn fíkniefnin", segir Kjartan Ægir.

Refsiramminn fyrir minniháttar fíkniefnabrot er sex ár en 12 ár fyrir stórfelld fíkniefnabrot.

"Það er í höndum lögreglunnar að rannsaka málið sem fer síðan til ákæruvaldsins innan lögreglunnar sem tekur síðan þá ákvörðun hvort málið verði sent til ríkissaksóknara sem tekur síðan ákvörðun um hvort ákært verði samkvæmt 173.grein hegningarlaganna. En ef lögreglustjórar fara með málið og gefa út ákæru er það bara samkvæmt ávana og fíkniefnalöggjöfinni sem er sex ára refsirammi en 12 ára refsirammi fyrir stórfelld fíkniefnabrot."

Kjartan segir auðvelt að áætla að menn taki frekar áhættuna að rækta fíkniefni í heimahúsi í stað þess að flytja þau inn á meðan misræmið er svona mikið í refsingunum.

"Mögulega er ein af þessum ástæðum sú að það eru gjaldeyrishöft í landinu og ég kem að því ritgerðinni minni. Það er einnig ástæða fyrir því að heimaræktun hefur aukist", segir Kjartan.