Vaðlaheiðargöng fyrsta mál til umræðu

Stjórnarfrumvarp fjármálaráðherra um Vaðlaheiðargöng er fyrsta þingmál sem búið er að setja á dagskrá Alþingis í dag, en þingfundur hófst kl. 10.30.

Athygli var vakin á því í frétt á Vísi í gær að tilboð lægstbjóðanda í verkið, frá ÍAV og Marti, rennur út á fimmtudag. Vaðlaheiðargöng hafa setið föst í meðförum þingsins undanfarnar þrjár vikur en miðað við þetta gæti málið komið til lokaatkvæðagreiðslu á næstu dögum.

Framhald annarrar umræðu um jarðgöngin hefst væntanlega nú um klukkan ellefu, fyrir hádegi, að lokinni umræðu um störf þingsins. Sjö þingmenn eru á mælendaskrá. Líklegt verður að telja að annarri umræðu ljúki í dag, málið fari þá til þingnefndar en þar sem það hefur þegar fengið þar ítarlega umfjöllun gæti það komið fljótt til þriðju umræðu og lokaatkvæðagreiðslu.

Ef það verður samþykkt fær fjármálaráðherra fyrir hönd ríkissjóðs heimild til að undirrita lánasamning við Vaðlaheiðargöng hf. um lán til gangaframkvæmda fyrir allt að 8.700 milljónum króna. Veggjöldum er síðan ætla að greiða lánið til baka á 28 árum. Deilt er um hvort þær áætlanir séu raunhæfar.