Segir aðgerð LÍÚ varðandi vinnustöðun hugsanlega ólöglega

VG skrifar 2. júní 2012 16:20

Gylfi Arnbjörnsson, forseti ASÍ, segir á Facebook síðu sinni að félagsleg aðgerð LÍÚ, um að hvetja aðildarfélög sín til þess að hefja vinnustöðvun eftir helgi, sé hugsanlega ólögleg og að þeir sem verði fyrir fjárhagslegum skaða vegna þessa ættu að geta fengið skaðabætur höfði þeir mál.

Gylfi segir að skilji hann ákvörðun LÍÚ rétt þá sé sambandið að beita Alþingi félagslegri aðgerð til þess að þvinga fram breytingar á áformum um breytingar á lögum. „Þetta gerðu þeir líka fyrir ári í tengslum við sömu deilu við gerð kjarasamninga," bætti Gylfi við á Facebook-síðu sinni.

Hann segir þetta algerlega bannað samkvæmt 17. grein laga um stéttarfélög og vinnudeilur.

„Það væri í rauninni eðlilegt að LÍÚ óski eftir því við SA [Samtök atvinnulífsins] að lögunum verði breytt til að heimila þetta í stað þess að brjóta sífellt lögin. Þeir sem verða fyrir fjárhagslegum skaða af þessari vinnustöðvun geta farið í mál við LÍÚ og fengið hann bættan!" skrifar Gylfi ennfremur.

Eins og fram hefur komið á Vísi í dag þá hyggjast aðildarfélög LÍÚ halda skipaflota sínum heima út vikuna í mótmælaskyni vegna fyrirhugaðra kvótafrumvarpa ríkisstjórnarinnar. Friðrik J. Arngrímsson, framkvæmdastjóri LÍÚ vonaðist til þess að það myndi leiða til þess að allir aðilar myndu setjast niður við samningaborðið og leita að lausn sem sambandinu þykir viðunandi. Þingflokksformaður Vinstri grænna, Björn Valur Gíslason, sagði vinnustöðvunina ógeðfellda.

Lögin sem Gylfi vitnar í hljóða svona orðrétt

Óheimilt er og að hefja vinnustöðvun:

1. Ef ágreiningur er einungis um atriði, sem Félagsdómur á úrskurðarvald um, nema til fullnægingar úrskurðum dómsins.

2. Ef tilgangur vinnustöðvunarinnar er að þvinga stjórnarvöldin til að framkvæma athafnir, sem þeim lögum samkvæmt ekki ber að framkvæma, eða framkvæma ekki athafnir, sem þeim lögum samkvæmt er skylt að framkvæma, enda sé ekki um að ræða athafnir, þar sem stjórnarvöldin eru aðili sem atvinnurekandi. Gildandi lög um opinbera starfsmenn haldist óbreytt þrátt fyrir þetta ákvæði.

3. Til styrktar félagi, sem hafið hefur ólögmæta vinnustöðvun.

Tengdar fréttir

Skipin verða í höfn í viku - vilja breiða sátt um kvótafrumvörp

"Við erum að tala um að nota næstu viku til þess að fara yfir stöðu málsins með starfsmönnum útgerðanna og fleiri aðilum sem málið varðar,“ segir Friðrik J. Arngrímsson, framkvæmdastjóri Landssambands íslenskra útvegsmanna (LÍÚ) en nær allur skipafloti Íslands mun ekki halda til veiða á mánudaginn í mótmælaskyni við frumvörp ríkisstjórnarinnar um stjórn fiskveiða og veiðigjöld og eru til meðferðar á Alþingi núna.

2. júní 2012 14:29

Skipafloti íslands fer ekki til veiða á mánudaginn í mótmælaskyni

LÍÚ hefur beint því til félagsmanna sinna að halda ekki til veiða á mánudaginn, daginn eftir sjómannadaginn. Þannig hafa Landssamband íslenskra útvegsmanna og aðildarfélög þess, Útvegsmannafélag Austfjarða, Útvegsmannafélag Akraness, Útvegsmannafélag Hafnarfjarðar, Útvegsbændafélagið Heimaey, Útvegsmannafélag Hornafjarðar, Útvegsmannafélag Norðurlands, Útvegsmannafélag Reykjavíkur, Útvegsmannafélag Snæfellsness, Útvegsmannafélag Suðurnesja, Útvegsmannafélag Vestfjarða, Útvegsbændafélag Vestmannaeyja og Útvegsmannafélag Þorlákshafnar hafa gert eftirfarandi samþykkt að halda ekki til veiða eftir helgi.

2. júní 2012 13:15

Björn Valur segir ákvörðun LÍÚ og aðildarfélaga ógeðfellda

"Í fyrsta lagi finnst mér þetta afar ógeðfellt af þeirra hálfu, sérstakleg í ljósi þess að þeir eru að nýta sér lögbundin frídag og hátíðardag sjómanna í þeim tilgangi að beita sjómönnum fyrir sér í þessari deilu,“ segir Björn Valur Gíslason, þingflokksformaður Vinstri grænna um ákvörðun LÍÚ og aðildarfélög sambandsins um að halda ekki til veiða á mánudaginn eftir sjómannadag.

2. júní 2012 15:53

Mest lesið

Fleiri fréttir