Björn Valur segir ákvörðun LÍÚ og aðildarfélaga ógeðfellda

„Í fyrsta lagi finnst mér þetta afar ógeðfellt af þeirra hálfu, sérstakleg í ljósi þess að þeir eru að nýta sér lögbundin frídag og hátíðardag sjómanna í þeim tilgangi að beita sjómönnum fyrir sér í þessari deilu," segir Björn Valur Gíslason, þingflokksformaður Vinstri grænna um ákvörðun LÍÚ og aðildarfélög sambandsins um að halda ekki til veiða á mánudaginn eftir sjómannadag.

Nú stefnir í að nær allur skipafloti Íslands verði bundin við bryggju út næstu viku en tímann ætla útgerðirnar og forsvarsmenn LÍÚ að nýta til þess að ræða við starfsmenn útgerðanna og kynna sjónarmið sín. Björn Valur segir ákvörðunina fordæmalausa og beinlínis fráleita.

Spurður um gagnrýni Friðriks J. Arngrímssonar, framkvæmdastjóra Landssambands íslenskra útvegsmanna, þar sem hann sagði ekkert samtal vera á milli ríkisstjórnarinnar og útvegsmanna, og hvort það væri ekki ráð að setjast niður með og finna lausn á deilunni í ljósi þess að nú virðist hún fara verulega harðnandi, svarar Björn Valur: „Það hefur aldrei staðið á stjórnvöldum að setjast niður með LÍÚ. Það er ekki hægt að kvarta yfir því með nokkurri sanngirni að þeir sem vildu koma að þessu máli hafi ekki fengið það."

Björn Valur bætir við að á Íslandi sé það Alþingi sem setji lög, „en það kann að vera nýlunda fyrir útvegsmenn að þeir geri það ekki sjálfir, en þannig er það í dag," segir Björn Valur.

Spurður hvort ríkisstjórnin sé ekki að ganga of langt með hugmyndum sínum um veiðigjaldið svarar Björn Valur því til að þeir einu sem gangi of langt í þessu máli séu útgerðarmennirnir sjálfir. „Það eru þeir sem eru að rjúfa öll samtöl með þessari ákvörðun."

Björn Valur spyr svo hvað það sé sem þeir ætli að segja við starfsfólk sitt vikuna sem skipin liggja við bryggju.

„Fyrst þeir ætla að gera þetta því ekki bjóða stjórnmálamönnum og fjölmiðlafólki á þessa fundi svo það geti farið fram almennileg umræða," segi Björn.

„En þetta er fyrst og fremst ógeðfelld ákvörðun, óréttmæt og ósanngjörn gagnvart sjómönnum og hátíðisdeginum sjálfum. Ég á mjög erfitt með að sætta mig við að sjómannadagurinn sé notaður með þessum hætti. Einnig að sjómönnum sé neitað að komast til vinnu á ný," segir Björn Valur og bætir við: „Sjómannadagurinn verður haldinn í skugga LÍÚ í ár."