Býður stjórnmálamönnum á fund: "Komi þeir sem þora“

„Ég hvet hér með Steingrím J. Sigfússon til þess að mæta og ræða við okkur og sjómenn Brims á opnum fundi næsta þriðjudag," segir Guðmundur Kristjánsson, forstjóri útgerðarfélagsins Brims, en hann ætlar að standa fyrir opnum fundi í Brimshúsi á miðbakkanum á Reykjavíkurhöfn klukkan tólf næsta þriðjudag.

Hann vill að sjávarútvegsráðherrann komi á fundinn til þess að ræða frumvörp um stjórn fiskveiða og veiðigjöld en allur skipafloti Brims mun ekki fara til veiða næsta mánudag, heldur verður flotinn við bryggju eitthvað út vikuna í mótmælaaðgerðum útvegsmanna.

Tímann ætla útgerðirnar að nýta til þess að kynna fyrir starfsmönnum sínum stöðu mála og hver framtíðin verður verði frumvörpin samþykkt. Guðmundur segist reyndar líta svo á að frumvörpin hafi þegar verið samþykkt. „Við teljum að það sé þingmeirihluti fyrir þessu," segir Guðmundur sem hringdi í Björn Val Gíslason, þingflokksformann Vinstri grænna í dag, og bauð honum og stjórnmálamönnum á fundinn á þriðjudaginn. Þá verður fundurinn einnig opinn fyrir fjölmiðlum.

Spurður um gagnrýni ríkisstjórnarinnar um að beita sjómönnum fyrir sér með aðgerðinni um vinnustöðvun svarar Guðmundur því til að málið varðar sjómenn, sem og hag allra landsmanna, en í hans huga er ekki um eiginlega vinnustöðvun að ræða, heldur tímabundna mótmælaaðgerð.

Þá gagnrýndu bæði Steingrímur og Björn Valur fyrirkomulag fundanna sem útgerðirnar ætluðu að halda. Þannig sagði Björn Valur að fyrst að útgerðirnar ætluðu að halda slíka fundi, því ekki bjóða stjórnmálamönnum og fjölmiðlafólki einnig svo þar gæti farið fram almennileg umræða um málefnið.

Þessu kalli segist Guðmundur nú vera að svara. Hann vill fá fulltrúa ríkisstjórnarinnar til þess að takast á um málið á opnum hádegisfundi.

„Komi þeir sem þora," segir Guðmundur að lokum.