Olíurannsóknir gengu framar vonum vegna veðurblíðu

Olíurannsóknaleiðangur á Jan Mayen-hryggnum, sem áætlað var að tæki rúma þrjá mánuði, gekk mun betur vegna einmuna veðurblíðu á svæðinu og lauk honum fyrir helgi eftir aðeins liðlega tveggja mánaða útivist. Rannsóknarleiðangurinn nýtti Akureyri sem þjónustumiðstöð og voru þessar myndir teknar þar fyrr í sumar þegar flotinn kom þangað inn til áhafnaskipta og til að sækja sér vistir og aðra þjónustu.

Rannsóknaskipið Nordic Explorer fór fyrir flotanum en með því voru þrjú fylgdarskip, tvö færeysk og eitt íslenskt, Valberg VE, sem lagði upp frá Keflavík í byrjun júní. Útgerðarmaður Valbergs, Garðar Valberg Sveinsson, segir að áætlað hafi verið að leiðangurinn tæki 92 daga en reyndin varð sú að aðeins þurfti 67 daga til að ljúka verkefninu, sem fólst í að sigla alls um níu þúsund kílómetra fram og til baka um svæðið til hljóðbylgjumælinga, einkum Noregsmegin lögsögumarkanna en einnig Íslandsmegin á Drekasvæðinu.

Garðar segir að það sé einkum veðrinu að þakka hversu vel gekk, það hafi verið gott allan tímann og aldrei hafi þurft að gera hlé á mælingum vegna veðurs. Þá hafi bilanir einnig verið í lágmarki.

Leiðangurinn er alfarið kostaður af Olíustofnun Noregs en gerður í samstarfi við Orkustofnun á Íslandi og fara rannsóknargögnin nú til úrvinnslu í Noregi. Þeim er ætlað að gefa vísbendingar um hvar vænlegast sé að finna olíu eða gas en tilvist slíkra auðlinda þarf síðan að staðfesta með nánari rannsóknum og borunum.

Íslenska skipið Valberg hafði það hlutverk að mæla hitastig sjávar á mismunandi dýpi og hversu hratt hljóð bærist um sjóinn. Garðar er nú að sigla Valberg til Norður-Noregs en þar taka við fleiri slík rannsóknarverkefni með Nordic Explorer, fyrst í nágrenni Tromsö en síðan í Barentshafi, og býst Garðar við að þau muni standa fram í lok september eða byrjun október.