Þingmenn vilja styðja við íslenska tónlist

Fimmtán þingmenn úr öllum flokkum hafa lagt fram þingsályktunartillögu um myndun starfshóps sem á að útfæra stuðning við íslenskt tónlistarlíf. Starfshópurinn á m.a. að skoða hvernig efla megi sköpun, tónleikahald, þróunarstarf og útflutning á íslenskri tónlist. Hópurinn á að skila niðurstöðum í vor á næsta ári.

Þingmennirnir telja mikilvægi tónlistarinnar fyrir íslenska menningu seint verða metið til fjár. Íslensk tónlist er m.a. sögð hafa aukið áhuga erlendra ferðamanna á Íslandi sem áfangastað.

Starfshópurinn á að skoða með hvaða hætti sé hægt að styðja við tónlistamenn og tryggja sanngjarna þóknun fyrir notkun verka þeirra svo fátt eitt sé nefnt. Hópurinn á að vera skipaður fulltrúum frá STEF, Sambands flytjenda og hljómplötuframleiðenda og Útflutningsskrifstofu íslenskrar tónlistar.