Brýnt að styrkja línukerfið milli landshluta

Markaðsstjóri Landsvirkjunar telur brýnt að styrkja flutningskerfi raforku milli landshluta, - það myndi efla uppbyggingu iðnaðarsvæðis við Húsavík.

Vegna fyrirhugaðra iðjuvera á Bakka er rætt um að reisa þurfi tvær virkjanir í Mývatnssveit. Landsvirkjunarmenn líta hins vegar ekki svo á að þeir séu að selja orku frá tilteknu orkuveri heldur úr raforkukerfi fyrirtækisins sem heild.

Í viðtali í fréttum Stöðvar 2 segir Magnús Bjarnason, framkvæmdastjóri markaðs- og viðskiptaþróunarsviðs Landsvirkjunar, að bygging Búðarhálsvirkjunar, sem nú er að ljúka, muni styrkja raforkukerfið, sem og sú uppbygging sem er að hefjast á Norðausturlandi. Það sé hins vegar einnig mikilvægt að styrkja flutningskerfið. Þannig gæti umframorka sem til er í kerfinu nýst betur en til þess þarf öflugri háspennulínur sem geti flutt mikla raforku landshluta á milli.

„Til þess að ná betri nýtingu út úr orkuframleiðslunni, að það sé hægt að hafa flutningskerfið með þeim hætti að hægt sé að flytja orkuna hvert sem er, - þetta hlýtur að vera eitthvað sem við horfum til hér á Íslandi á næstu árum, að styrkja flutningskerfið enn frekar," segir Magnús.

Hann segir að þetta myndi styrkja Norðausturland sem iðnaðarsvæði. Það sé langtímaverkefni að byggja upp nýtt iðnaðarsvæði á Bakka.

„Það er mjög mikilvægt fyrir það iðnaðarsvæði að það séu öflugir flutningar fyrir raforku að svæðinu," segir Magnús og bendir á Grundartanga sem hliðstæðu. Þar hafi orðið stórkostlegt uppbygging á tiltölulega skömmum tíma og þar séu komin blómleg fyrirtæki.

„En það byggir allt á því að þar eru mjög öflugar leiðir að svæðinu og það er gott að komu orku þangað inn."