Tíu og tólf ára drengir kveiktu óvart í Fellaskóla

Tveir tíu og tólf ára gamlir drengir kveiktu í Fellaskóla á áttunda tímanum í gærkvöldi. Allt tiltækt slökkvilið var kallað út þegar tilkynning barst um eldsvoðann en það tók slökkviliðsmenn stuttan tíma að ráða niðurlögum eldsins.

Samkvæmt upplýsingum frá lögreglunni á höfuðborgarsvæðinu var um óviljaverk að ræða en lögreglan hafði upp á drengjunum í gærkvöldi eftir ábendingar vitna sem sáu til þeirra uppi á þaki hússins. Í ljós kom að drengirnir kveiktu í dagblöðum og svo virðist sem logandi blað hafi farið í þakskyggnið og í kjölfarið læsti eldurinn sig í húsinu.

Þakið er nokkuð illa farið en ekki er talið að tjónið sé mikið. Samkvæmt lögreglu hefði getað farið mun verr en raun bar vitni. Mál piltanna hefur verið tilkynnt til barnaverndaryfirvalda eins og venjan er í svona málum. Málið telst upplýst.