Hjúkrunarfræðingar fengu ekki fund með forsætisráðherra

„Þetta eru ekki einhverjar skipulagðar hópuppsagnir," segir Ragnheiður Gunnarsdóttir, varaformaður Félags íslenskra hjúkrunarfræðinga. RÚV greindi frá því í hádegisfréttum sínum að tugir hjúkrunarfræðinga hefðu sagt upp störfum á Landspítalanum á föstudaginn. Ragnheiður segir að þessar uppsagnir hafi ekki verið gerðar í samráði við félagið og því viti hún ekki hversu margir hafi sagt upp.

„Það er bara komin afskaplega mikil þreyta í hjúkrunarfræðinga og við í stjórninni höfum fundað með hjúkrunarfræðingum og við finnum afskaplega mikla þreytu út af meira vinnuálagi og það má alveg segja það að það virðist halla á okkur þegar kemur að því hvernig ríkið ætlar að raða fólki eftir menntun," segir Ragnheiður.

Ragnheiður segir að hjúkrunarfræðingar hafi ekki fengið að taka þátt í viðræðum með stjórnvöldum um kjaramál. BHM og ASÍ hafi fengið fund með Jóhönnu Sigurðardóttur forsætisráðherra. Hjúkrunarfræðingar hafi óskað eftir því að fá að taka þátt í þeim viðræðum en ekki fengið aðkomu að því. Hún segir að Guðbjartur Hannesson velferðarráðherra hafi aftur á móti sýnt málstað hjúkrunarfræðinga skilning. Ragnheiður bendir á að það sé friðarskylda hjá hjúkrunarfræðingum. Í henni felst að hjúkrunarfræðingar geta ekki gripið til verkfalls.

Ragnheiður segir að hjúkrun sé að verða meira og minna dagvinnustétt. „Af þvi að það er verið að breyta mörgum deildum í dagdeildir og verið að sinna svo mörgum verkefnum á dagdeildarbasis," segir hún. Þetta sé góð þróun en að sama skapi geti vinnuveitandinn ekki sagt að hjúkrunarfræðingar taki stærsta hluta launa sinna í gegnum vaktavinnu.