Óttaðist um líf sitt

Ungur maður sem var ógnað af ræningja með byssu í söluturni í fyrrakvöld segist hafa óttast um líf sitt. Hann hélt í fyrstu að um grín væri að ræða. Lögregla leitar ræningjans ennþá.

Það var klukkan hálf tólf á föstudagskvöldið sem að karlmaður vopnaður byssu réðst inn í söluturn við Grundarstíginn og ógnaði tvítugum sálfræðinema sem var þar við vinnu.

„Ég stóð og var að laga til í videospólunum og þá kemur hann inn og byrjar að öskra. Ég held fyrst að þetta sé einhver að gera misheppnað grín, lít upp og þá sé ég að hann heldur á byssu. Síðan kemur hann, hann er svolítið fljótur að labba, hann kemur hérna og slær mig í öxlina með byssunni," segir Sölvi Sigurðarson sálfræðinemi.

„Hann segir mér að fara í áttina að kassanum. Hann öskrar eitthvað á ensku, „I shoot" og eitthvað svona fleira fallegt. Ég þorði ekki að taka sénsinn á því að þetta væri plat eða hvort hann myndi skjóta mig. Þannig að mér fannst réttast að hlýða honum," segir Sölvi.

Ræninginn hafði tæplega 30 þúsund krónur á brott með sér. Sölvi segir að þó hann hafi heyrt hvell þegar skotið var úr byssunni hafi honum brugðið þegar lögreglan fann skothylki. Hún hafi tjáð honum að líklega hefði verið um púðurskot að ræða.

Sölvi segist hafa verið hræddur um líf sitt á tímabili. „Þegar hann var með byssuna og miðaði í andlitið á mér," segir hann. Hann telur að það hafi tekið lögregluna um fimm mínútur að mæta á staðinn. „Þá var sjoppan stútfull af lögrelgumönnum," segir hann. Lögregla fór svo með Sölva á bráðamóttöku Landpsítalans. Þar voru teknar myndir af áverkunum, sem voru ekki miklir. „Bara smá far eftir hlaupið á byssunni," segir Sölvi.