Minna eytt en áætlað var og tekjur hærri

Ríkissjóður eyddi 35 milljörðum króna meira en hann aflaði á fyrstu tíu mánuðum ársins. Það er þó umtalsvert betri staða en reiknað hafði verið með, eða sem nemur 19,1 milljarði króna. Þetta kemur fram í mánaðarhlutauppgjöri A-hluta ríkissjóðs í október.

Betri staða skýrist að mestu leyti af því að innheimtar tekjur ríkissjóðs voru 5,1 milljarði króna umfram áætlun. Skattar og tryggingagjöld í heild námu 378,3 milljörðum, eða 14,7 milljörðum umfram áætlun. Munar þar mestu um skatta á tekjur og hagnað sem voru 13,9 milljörðum hærri en reiknað hafði verið með. Innheimtar tekjur ríkissjóðs voru alls 411,5 milljarðar króna á tímabilinu.

Gjöldin voru hins vegar 446,5 milljarðar króna, en það er sex milljörðum króna lægri upphæð en reiknað hafði verið með. Gjöld einstakra ráðuneyta voru í flestum tilvikum undir áætlunum.

Handbært fé frá rekstri A-hluta ríkissjóðs var neikvætt um 37 milljarða króna til októberloka 2012. Það er 19,1 milljarði krónum betri útkoma en áætlun gerði ráð fyrir. Á sama tímabili árið 2011 var handbært fé frá rekstri hins vegar neikvætt um 59,9 milljarða króna.

kolbeinn@frettabladid.is